Францын 700 орчим сүлжээ дэлгүүрт 10-р сарын 12-нд температурын хяналтын программ хакердуулж, хөргөгч болон хөлдөөгчдийн дулаан Цельсийн 80 хэм буюу Фаренгейтийн 176 хэм хүртэл халсан байна. Үүний уршгаар 'Intermarché', 'Carrefour', 'Monoprix' зэрэг сүлжээний ажилтнууд муудсан их хэмжээний хүнсийг устгалд оруулахад хүрчээ. Францын Гадаад хэргийн сайд Жан-Ноэль Барро уг үйл явдлыг нутаг дэвсгэрт нь гарсан анхны хорлон сүйтгэх томоохон халдлага хэмээн тодорхойлсон бөгөөд эрх баригчид үүнийг Ираны Хувьсгалт гвардитай холбоотой кибер бүлэглэл үйлдсэн гэж үзэв.
Сүүлийн таван жилийн хугацаанд Францын ажилгүйдлийн алба, цагаачлалын газар, боловсролын яам, эмнэлгүүд болон татвар төлөгчдийн систем удаа дараа хакердуулжээ. Тухайлбал өнгөрсөн наймдугаар сард Сангийн яам 680,000 орчим иргэний татварын хувийн мэдээлэл алдагдаж, цахим сүлжээнд зарагдсан болохыг мэдэгдсэн юм. Түүнчлэн үндэсний агаарын тээврийн 'AirFrance-KLM', томоохон даатгалын байгууллагууд болон 'Crédit Mutuel Arkéa' банкнаас 100 сая евро хулгайлсан хэрэг гарсан нь Францыг Европын хамгийн эмзэг эрх зүйн бүс нутаг болгожээ.
Кибер аюулгүй байдлын шинжээч Деннис-Кенжи Кипкерийн тайлбарласнаар, Франц улс хамгийн сул доройдоо биш, харин түгжээгүй хаалга олонтой, маш өндөр үнэ цэнтэй бай учраас халдлагад өртдөг байна. Тус улс цөмийн гүрэн, НҮБ-ын Аюулгүйн Зөвлөлийн байнгын гишүүн, Европын хоёр дахь том эдийн засаг төдийгүй Украиныг тууштай дэмжигч тул улс төрийн болон санхүүгийн ашиг хонжоо хайгчдын анхаарлыг зүй ёсоор татдаг аж.
Түүнчлэн Франц нь төвлөрсөн засаглалтай тул эрүүл мэндийн программ нийлүүлэгч эсвэл хөдөлмөр эрхлэлтийн нэг л байгууллага руу нэвтрэхэд сая сая хүний мэдээллийг нэгэн зэрэг хулгайлах боломж олгодог. Үүний сацуу 'Microsoft' компанийн 2026 оны Дижитал хамгаалалтын тайланд Украин кибер заналхийлэлд хамгийн их өртдөг гэж дурдсан бол 2025 оны 12-р сард Польшийн эрчим хүчний сүлжээ рүү Оростой холбоотой томоохон дайралт хийсний улмаас Европын Холбоо болон Их Британи анхны хамтарсан кибер хоригоо тогтоож байв.
Дэлгүүрүүдийн хөргөгчийг онилсон дайралт 11-р сард Бельги, Люксембург, Финланд, Эстони, Шведэд давтагдсан бөгөөд үүнд Данийн 'Danfoss' компанийн ашиглалтаас гарсан, шинэчлэлт хийгддэггүй тоног төхөөрөмжүүд өртсөн нь тогтоогдсон юм. Европын Холбоо гишүүн орнууддаа кибер аюулгүй байдлыг сайжруулахад олон тэрбум евро хуваарилж, Франц улс Польшийн дараа хоёрдугаарт ордог ч үндсэн бүтцэд байгаа техникийн цоорхойнуудыг бүрэн арилгаж чадаагүй байна.
Европын Холбоо 2022 онд гол салбарын байгууллагуудад хамгаалалтын хяналтаа нотлохыг үүрэг болгосон 'NIS2' удирдамжийг баталсан ч Франц үүнийг одоог хүртэл бүрэн хэрэгжүүлээгүй хоцорч байна. Хакерууд хиймэл оюун ухаан ашиглан халдлагын цар хүрээгээ тэлж буй энэ үед дижитал нийлүүлэлтийн сүлжээний аюулгүй байдлыг чангатгах, цахим эрүүл ахуйн үндсэн дүрмийг мөрдүүлэх шаардлага улам бүр чухал болжээ.
