Австралийн Викториа мужийн Боловсролын сургалтын хөтөлбөр, үнэлгээний газар (VCAA)-ын албан ёсны цахим хуудас төгсөлтийн шалгалтын үеэр цахим халдлагад өртсөн тул албаныхан шалгалтын ажиллагаа эхлүүлжээ.
Халдлагын дараа тус байгууллагын нүүр хуудаст алдаа зааж байсан бөгөөд удалгүй 'Тун удахгүй эргэн ажиллана' гэсэн мэдэгдлээр сольсон байна. Одоогоор цахим хуудсанд техникийн засвар үйлчилгээ хийгдэж байгаа тул хэрэглэгчдээс хүлцэл өчсөн бичиг байршуулжээ.
VCAA-ын төлөөлөгч цахим хуудас халдлагад өртсөнийг албан ёсоор баталсан бөгөөд халдлагын цар хүрээг нарийвчлан тогтоохоор дижитал шинжилгээ хийж байгаагаа мэдэгдэв. Түүнчлэн одоогийн байдлаар энэ өдрийн болон өмнөх долоо хоногуудын шалгалтын материал, даалгавруудад халдсан шинж тэмдэг илрээгүй гэдгийг онцоллоо.
Викториа мужийн сурагчдын VCE төгсөлтийн шалгалтууд 11 дүгээр сарын 18-ныг дуустал хуваарийн дагуу үргэлжилнэ.
