Удирдаач Фридеманн Риле симфони рок концертын хэлбэрийг Прага хотод анхлан нэвтрүүлснээс хойш 25 жилийн дараа ойн тусгай тоглолтоороо Чехийн нийслэлд дахин эргэн ирэхээр боллоо. 'Rock the Opera' нэртэй энэхүү тоглолт 2026 оны арванхоёрдугаар сарын 13-ны ням гарагт Прага хотын Муниципал ордны Сметана танхимд болох тов гарчээ.
Уг тоглолтод Прагийн Филармонийн найрал хөгжим, рок хөгжимчид болон гоцлол дуучид оролцож, рок хөгжмийн түүхэн дэх шилдэг бүтээлүүдийг амилуулах юм. Риле анх 2001 оны аравдугаар сарын 29-нд Прага хотноо симфони найрал хөгжмийг рок бөмбөрчин, дуучидтай хослуулсан анхны шоугаа зохион байгуулж, удирдаж байсан бөгөөд энэхүү ойн арга хэмжээ нь түүний хувьд чухал эргэн ирэлт болж байна.
Анх туршилт байдлаар эхэлсэн энэхүү санаачилга нь өдгөө олон улсын томоохон төсөл болтлоо өргөжжээ. Өнгөрсөн хугацаанд Риле Европ даяар 100 гаруй симфони рок концерт удирдан тоглуулсан бөгөөд Исландаас эхлээд Истанбул хүртэл, тэр дундаа Венийн Улсын дуурь, Берлиний Филармони, Афины Герод Аттикусын театр зэрэг нэр хүндтэй тайзнаа үзэгчдэд хүргэсэн байна.
Прагад болох ойн тоглолтод орчин үеийн рок хөгжмийн нэрт хоолой гэгддэг дуучин Ронни Ромеро оролцож, симфони найруулгатай бүтээлүүдийг дуулна. Тоглолтын хөтөлбөрт Pink Floyd, Queen, AC/DC, Led Zeppelin, U2 зэрэг дэлхийд алдартай хамтлагуудын хит дуунууд багтжээ.
Тайзнаа Ромерогоос гадна дуучин Люси Коутникова, Сабина Олийве, гитарчин Иржи Рамбоусек, бөмбөрчин Франтишек Хёниг нар тоглоно. Харин Прагийн Филармонийн найрал хөгжмийг удирдаач Фридеманн Риле өөрөө удирдах бөгөөд тасалбарыг Ticketportal системээр худалдаалж эхэллээ.
