АНУ-ын Охайо мужийн Хойд дүүргийн Прокурорын газраас Массачусетс мужийн Квинси хотын оршин суугч, 31 настай Жинмин Ченд хуурамч гэрлэлт зохион байгуулж, цагаачлалын бичиг баримт хуурамчаар үйлдсэн хэргээр холбооны их тангарагтны шүүхээс яллах дүгнэлт үйлдсэнийг зарлалаа. Энэхүү мөрдөн шалгах ажиллагаанд АНУ-ын Иргэншил, цагаачлалын алба (USCIS) хамтран ажилласан байна.
Шүүхийн баримтаас үзвэл, АНУ-ын иргэн Чен нь Охайо мужийн Аврора хотод оршин суух БНХАУ-ын иргэнээс мөнгө авч, хуурамчаар гэрлэсэн аж. Тэд гэрлэлтээ бодитой мэт харагдуулахын тулд хуурамч нотлох баримтууд бүрдүүлж, цагаачлалын бичиг баримтыг зассан байна. Мөн грийн карт болон бусад цагаачлалын давуу эрхийг хууль бусаар авах зорилгоор USCIS-д худал мэдүүлэг гаргаж байжээ. Чен грийн карт олгох үйл явцын шат бүрд төлбөрөө хувааж авахаар тохиролцсон байсан нь илэрсэн байна.
Сэжигтнүүд цахим сүлжээгээр танилцаж, холын зайн харилцаатай байсан мэт хуурамч түүх, тэднийг хэн танилцуулсан тухай зохиомол тайлбар бэлджээ. Үүнээс гадна гэрлэлтийн өмнөх гэрээ байгуулах, банкны хамтарсан данс, үүрэн утас, даатгал болон хөнгөлөлтийн сүлжээ дэлгүүрийн гишүүнчлэлийг хамтдаа нээлгэх зэргээр бэлтгэл хангасан байна. Тэд Квинси хотод гэрлэх хүсэлтээ өгсөн бөгөөд Чен хамсаатандаа хуримын ёслолд зориулж хямд үнэтэй хиймэл алмаазан бөгж авахыг зааварчилжээ.
Гэрлэснийхээ дараа Чен өргөдөл бөглөгчид заавар өгч, гэр бүлийн гишүүнийг урих цагаачлалын I-130 маягтыг мэдүүлсэн нь хамсаатандаа байнгын оршин суух эрх буюу грийн карт авах замыг нээх зорилготой байв. Энэ хэргийг АНУ-ын Дотоодын аюулгүй байдлын мөрдөх алба болон USCIS-ийн Луйврыг илрүүлэх, үндэсний аюулгүй байдлын газар шалгаж, туслах прокурор Брайан Макдоно шүүхэд төлөөлөн ажиллаж байна. Хэрэв шүүхээс түүний гэм буруутайг нотолбол тав хүртэлх жилийн хорих ял шийтгэх хуулийн заалттай юм.
