АНУ-ын Иргэншил, Цагаачлалын Үйлчилгээний газар (USCIS) болон Хойд Охайогийн Холбооны Прокурорын газраас мэдээлснээр, хуучин эмч Юсиф Абдулрауф Алхаллаг иргэншил авахдаа хуурамч мэдүүлэг өгсөн хэргээр ял шийтгүүлжээ. Тэрээр 2017 онд иргэншил авах өргөдөл гаргахдаа болон 2018 онд ярилцлага өгөх үедээ өмнөх гэмт хэргийн талаарх асуултуудад худал хариулсан байна.
Алхаллаг 2006 онд H-1B визээр АНУ-д ирж, 2011 онд байнгын оршин суугч болжээ. Тэрээр 2012 оноос Охайо мужийн зүүн хойд хэсэгт дотрын эмчээр ажиллаж байв. 2014 оны арванхоёрдугаар сард тэрээр найз бүсгүйгээ жирэмсэн болсны дараа түүний овьёосны кашинд үр хөндүүлэх эм хийж, найз бүсгүйгээсээ нууцаар жирэмслэлтийг нь зогсоохыг оролдсон байна.
Хэдэн жилийн дараа хохирогч энэ хэргийн талаар мэдэж, цагдаад мэдэгджээ. 2021 оны гуравдугаар сарын 18-нд Алхаллагт найз бүсгүй болон түүний урагт ноцтой гэмтэл учруулж, жирэмслэлтийг нь зогсоохыг оролдсон хэргээр аллага үйлдэхийг завдсан, хүнд гэмтэл учруулсан хоёр зүйл ангиар яллажээ. Тэрээр 2021 оны есдүгээр сард гэм буруугаа хүлээж, дөрвөн жилийн хорих ял сонссон юм.
Алхаллаг 2021 онд дээрх хэргээр ял сонсохоосоо өмнө буюу 2017 онд АНУ-ын иргэншил авах өргөдөл гаргасан байжээ. Тэрээр өргөдөл болон 2018 оны ярилцлагын үеэр гэмт хэрэгт холбогдож байсан эсэх тухай асуултуудад 'үгүй' гэж хариулсан байна. Ингээд 2018 оны тавдугаар сарын 4-нд АНУ-ын иргэншил авчээ.
Алхаллаг иргэншил авахдаа худал мэдүүлэг өгсөн нь тогтоогдсон тул 10 хүртэлх жилийн хорих ял болон иргэншлээсээ хасагдах эрсдэлтэй тулгарч байна. Энэхүү мөрдөн байцаалтыг USCIS-ийн Залилан илрүүлэх, Үндэсний аюулгүй байдлын газар болон АНУ-ын Цагаачлал, Гаалийн албаны Дотоодын аюулгүй байдлын мөрдөн байцаах алба хамтран явуулжээ.
