Өмнөд Солонгосын цэргийн дээд командлагч Умард Солонгосын зүгээс гаргах аливаа өдөөн хатгалгад хатуу хариу өгөхийг аравдугаар сарын 20-ны мягмар гарагт нийт бие бүрэлдэхүүндээ үүрэг болголоо. Умард Солонгос хоёр орны хилийн дагуу нэмэлт зэвсэг байрлуулж, чанга яригчаар суртал ухуулга хийх ажлаа сэргээнэ хэмээн мэдэгдсэний маргааш уг тушаалыг гаргав.
Өмнөд Солонгосын Штабуудын дарга нарын хорооны дарга, генерал Жин Ён Сон хилийн тэргүүн шугамын цэргийн ангид биечлэн зочлох үеэрээ энэхүү тушаалыг өгсөн байна. Есдүгээр сарын 21-нд болсон мина дэлбэрэлтэд Өмнөд Солонгосын гурван цэрэг шархадсан бөгөөд Пхеньян уг хэрэг явдлаас үүдсэн хурцадмал байдлын бурууг Сөүлд тохож буйг тэрбээр эрс буруушаажээ.
Умард Солонгосын тал өмнөдийн хууль ёсны үйл ажиллагааг өдөөн хатгалга гэж нэрлэн, цэргийн хурцадмал байдлыг бий болгосон хариуцлагыг бусдад тохож байгааг хэзээ ч хүлээн зөвшөөрөхгүй хэмээн генерал онцолсон байна. Мөн Штабуудын дарга нарын хорооноос гаргасан албан ёсны мэдэгдэлд тус улсын аюулгүй байдлыг хамгаалах үйл явцыг далимдуулан аливаа халдлага үйлдвэл цэргийн хүчээр шийдэмгий хариу цохилт үзүүлнэ гэдгийг тодорхой дурдлаа.
