Сенегалын нийслэл Дакар хотноо зохион байгуулсан Зуны залуучуудын Олимпын наадам хоёр долоо хоног үргэлжилсний эцэст баасан гарагт өндөрлөлөө. Африк тивд анх удаа зохион байгуулсан тус наадамд тив нутгийн багууд түүхэндээ хамгийн олон медаль хүртсэн амжилт үзүүлэв. Тэмцээний өдрүүдэд Дакар хотын гудамж, далайн эрэг спорт сонирхогчдоор дүүрч, хөгжөөн дэмжигчид ихээхэн идэвхтэй байлаа.
Энэ удаагийн наадамд 25 спортын төрлөөр 153 багц медалийн төлөө 2,700 орчим залуу тамирчин өрсөлдөв. Олон улсын Олимпын хорооны ерөнхийлөгч Кирсти Ковентри баасан гарагт болсон талархлын ёслолын үеэр 'Хүүхдийг өсгөн хүмүүжүүлэхэд бүхэл бүтэн тосгон шаардлагатай гэсэн Африкийн сайхан зүйр үг бий. Хэрэв энэ наадам бидэнд ямар нэгэн зүйл харуулсан бол тэр нь улс орон даяараа залуу үеийнхээ төлөө нэгдэхэд юунд хүрч болдгийг баталсан явдал юм' хэмээн онцлов.
Ковентри мөн наадмыг зохион байгуулсан Сенегалын ард түмэнд талархал илэрхийлж, тус улс болон Африк тив юу хийж чаддагийг дэлхий дахинд харуулсныг тэмдэглэлээ. Тэрбээр наадмыг зохион байгуулах түвшин урьдчилан тооцоолсон хүлээлтээс давсныг дурдаад, энэ нь Африкийн орнуудын ирээдүйн чадавхыг илтгэж буйг цохон дурдав.
Багийн дүнгээр Хятад улс 18 алтан медаль хүртэж тэргүүлсэн бол Япон 11, Орос найман алтан медаль авлаа. 2022 оны хоёрдугаар сард Украин руу бүрэн хэмжээний довтолгоо эхлүүлснээс хойш Оросын тамирчид анх удаа Олимпын наадамд өөрийн улсын төрийн далбаан дор өрсөлдсөн нь энэ болов.
Африкийн орнуудаас Египет зургаа, Этиоп болон Сенегал улсууд тус бүр таван алтан медаль авсан байна. Эх орондоо болсон наадамд 136 тамирчнаа сойсон Сенегал улс түүхэндээ анх удаа Олимпын алтан медаль хүртжээ. Дараагийн Зуны залуучуудын Олимп 2030 онд болох бөгөөд Чили, Парагвай, Тайланд улсууд зохион байгуулах хүсэлтээ албан ёсоор ирүүлээд байна.
