БНСУ-ын Кёнги аймгийн Пёнтек хот дахь Америкийн зэвсэгт хүчний 'Кэмп Хамфрис' баазад арваннэгдүгээр сарын 5-нд Солонгосын дайны ахмад дайчид зочиллоо. Энэхүү уулзалтын үеэр ахмад дайчид АНУ-ын шинэ үеийн цэрэг дайчидтай нүүр тулан уулзаж, хүндэтгэл үзүүлэх ховорхон агшин тохиосон юм.
Өдгөө 1950-1953 оны дайнд оролцож явсан 20,000 орчим ахмад дайчин БНСУ-д энх тунх амьдарч байгаа бөгөөд тэдний дундаж нас 94 хүрчээ. Тиймээс өндөр насалсан ахмадуудад үлдсэн хугацаанд нь эрүүл мэнд, халамж, санхүүгийн бодит тусламжийг шуурхай үзүүлэх явдал засгийн газрын хувьд нэн чухал асуудал болоод байна.
Эх оронч, ахмад дайчдын хэрэг эрхлэх яамны дэд сайд Кан Юн Жин төрийн гол бодлого ахмадуудад амьд ахуйд нь зохих халамж, хүндэтгэл үзүүлэхэд чиглэж буйг онцоллоо. Засгийн газраас ахмад дайчдад олгодог сарын тэтгэмжийг 50,000 воноор буюу 38 ам.доллароор нэмэгдүүлж, одоогийн 490,000 воноос 2027 он гэхэд 540,000 вон болгохоор төлөвлөөд байна.
Хэрэв уг төсөв батлагдвал 2018 оноос хойших хамгийн өндөр дүнтэй тэтгэмжийн өсөлт болох бөгөөд өнгөрсөн гуравдугаар сараас эхлэн бага орлоготой ахмад дайчдын ар гэр, бэлэвсэн эхнэрүүдийг ч дэмжлэгт хамруулжээ. Түүнчлэн ахмад дайчдад үйлчлэх гэрээт эмнэлгийн тоог одоогийн 1,117-гоос 2030 он гэхэд 2,000 болгон нэмэгдүүлж, оршин суугаа газартаа эмчилгээ авах боломжийг өргөтгөхөөр зорьж байна.
Ганц бие өндөр настнуудад зориулан гэрээр асрах үйлчилгээ үзүүлэхийн зэрэгцээ утасны идэвх, хаалганы мэдрэгч дээр суурилсан хиймэл оюун бүхий хяналтын системийг онцгой байдлыг тандах зорилгоор нэвтрүүлжээ. Эх орныхоо төлөө 70 гаруй жилийн өмнө өсвөр насандаа тулалдаж явсан баатруудаа нэр төртэй амьдруулахын тулд төрийн зүгээс бүхий л хүчин чармайлтаа гаргахаа дэд сайд амлав.
Үүнээс гадна тус яам НҮБ-ын тугийн дор тулалдаж байсан орнуудын ахмад дайчдын дурсамж, хувийн баримтыг дижитал архивт хадгалж, одоогоор 514 ярилцлага бүртгээд байна. Энэ удаагийн уулзалтад 18 насандаа фронтод тулалдаж байсан Рю Жэ Шик болон 15 настайдаа шархадсан цэргүүдийг асарч байсан Кан Гү Кон нарын ахмад дайчид хүрэлцэн иржээ.
