Испанийн Ла Лигийн 'Реал Мадрид' клуб өөрийн довтлогч Килиан Мбаппегийн гаргасан алдааны төлөө Хятадын ард түмнээс лхагва гарагт албан ёсоор уучлал хүслээ. Франц довтлогч нэгэн подкастад ярихдаа Хятадын удирдагч асан Мао Зэдуныг 'дарангуйлагч' гэж тодорхойлсон нь тус улсын иргэд болон байгууллагуудын хүчтэй дургүйцлийг хүргэсэн юм.
Хятад улсыг 1949 оноос 1976 онд нас барах хүртэл нь удирдсан Мао Зэдуны талаар хошигнох, шүүмжлэх явдал тус улсын нийгэмд хатуу хориотой сэдэвт тооцогддог. Реал Мадрид клуб мэдэгдэлдээ Хятадын түүх, соёл, иргэд болон тус улс дахь сая сая дэмжигчдээ гүнээ хүндэтгэдгээ онцолж, уг явдалд харамсаж буйгаа илэрхийлжээ.
Энэхүү маргааны улмаас Хятадын төрийн өмчит 'Migu' платформ ням гарагт болох Реал Мадридын тоглолтыг шууд дамжуулахгүй байхаар шийдвэрлэв. Тус платформ энэ амралтын өдрүүдэд Ла Лигийн 10 тоглолтоос 9-ийг нь хүргэх бөгөөд зөвхөн Реал Мадридын тоглолтыг хассан байна. Мөн тус улсын 'Mengniu', 'Shanghai Milkground', 'Eastroc Beverage' зэрэг томоохон компаниуд Мбаппетэй байгуулсан хамтын ажиллагаагаа бүрэн зогсоожээ.
Үүссэн нөхцөл байдалтай холбогдуулан Ла Лигийн ерөнхийлөгч Хавьер Тебас хямралын шуурхай баг байгуулж, БНХАУ-аас суугаа элчин сайд Яо Жинтэй уулзалт хийв. Испанийн хөлбөмбөгийн холбоо санхүүгийн ноцтой алдагдал хүлээхээс сэргийлэх зорилгоор Тебас ойрын хугацаанд Бээжин хотод биечлэн айлчлахаар төлөвлөж байгааг эх сурвалжууд мэдээлжээ.
Хятадын Гадаад харилцааны яамны хэвлэлийн төлөөлөгч Го Жякунь уг асуудлын талаар тайлбар өгөхдөө хөлбөмбөгчийн гаргасан уучлалыг нухацтай авч үзэж байгааг мэдэгдсэн байна. Сүүлийн жилүүдэд хоорондоо таагүй харилцаатай байсан Ла Лиг болон Реал Мадрид клуб санхүүгийн ихээхэн эрсдэлээс зайлсхийхийн тулд зөрчлөө хойш тавьж, хамтран ажиллаж эхэллээ.
