Словенийн Копер боомт Дундын коридорын дагуу Казахстантай тээврийн холбоогоо бэхжүүлж, ачаа тээвэрлэлтийн үр ашгийг дээшлүүлэх чиглэлээр хамтран ажиллах хүсэлтэй байна. Энэ тухай боомтын удирдах зөвлөлийн ерөнхийлөгч Невенка Кржан 'The Astana Times' сонинд өгсөн ярилцлагадаа онцоллоо. Казахстан улс Ази болон Европыг холбосон Транскаспийн олон улсын тээврийн чиглэл дэх байр сууриа идэвхтэй тэлж буй үед энэхүү түншлэл яригдаж байна.
Копер боомт нь төлбөр тооцоо, урьдчилан таамаглах дүн шинжилгээ, агуулахын менежментийг дэмждэг өөрийн мэдээллийн технологийн системийг хөгжүүлжээ. Уг дижитал шийдэл нь ачааг бодит цаг хугацаанд хянах, талбайн зохион байгуулалтыг оновчтой удирдах боломж олгодог байна. Тухайлбал, боомтын нутаг дэвсгэрт нэгэн зэрэг хадгалагдаж буй 45,000 орчим тээврийн хэрэгслийн байршлыг нэг бүрчлэн алдалгүй тодорхойлох өндөр нарийвчлалтай ажилладаг аж.
Невенка Кржан Казахстанд хийсэн айлчлалаараа төмөр замын операторууд, тээвэр зуучид болон логистикийн компаниудтай шууд харилцаа тогтоох эхлэлийг тавьснаа мэдэгдэв. Боомтын үйл ажиллагааг амжилттай явуулахад логистикийн сүлжээний бүх оролцогчдын нягт уялдаа холбоо чухал үүрэгтэйг тэрбээр цохон тэмдэглэлээ. Түүнчлэн гааль болон хяналт шалгалтын байгууллагуудын бичиг цаасны ажлыг хөнгөвчилсөн нэг цонхны үйлчилгээний туршлагаа хуваалцах боломжтой гэв.
Казахстан улсын Ерөнхийлөгч Касым-Жомарт Токаев болон Словенийн Ерөнхийлөгч Наташа Пирц Мусар нар 2025 онд тээврийн салбарын хамтын ажиллагааг хэлэлцсэн билээ. Словенийн Дэд бүтэц, эрчим хүчний сайд Ерней Вртовец мөн Европ, Азийг холбосон найдвартай тээврийн коридорыг хөгжүүлэхэд Казахстаны газар зүйн байршил онцгой ач холбогдолтойг мэдэгдсэн юм. Энэ хүрээнд Дундын коридор нь тив хоорондын олон төрөлт тээврийн сүлжээг өргөжүүлэхэд гол тулгуур болж байна.
Адриатын тэнгисийн хойд эрэгт байрладаг Копер боомт нь байгуулагдаад бараг 70 жил болж буй бөгөөд Төв болон Зүүн Европын зах зээлийг холбодог. Тус боомт 2025 онд 23 сая тонн ачаа, үүний дотор 1.27 сая TEU чингэлэг болон 915,000 орчим автомашин хүлээн авчээ. Ингэснээр Газар дундын тэнгисийн бүс нутаг дахь автомашин тээвэрлэлтийн хамгийн том зангилаа төв гэдгээ дахин батлав.
Тус боомт 2024–2028 оны стратегийн дагуу 785 сая евро буюу 883 сая ам.долларын хөрөнгө оруулалтын төслийг хэрэгжүүлж байна. Энэ ажлын хүрээнд чингэлгийн терминалын хүчин чадлыг 1.8 сая TEU-д хүргэж, 11,600 автомашины багтаамжтай олон давхар зогсоол шинээр барихаар төлөвлөжээ. Шинэ зогсоол ашиглалтад орсноор одоо байгаа байгууламжтай нийлээд нийт 25,000 орчим тээврийн хэрэгслийг битүү талбайд хадгалах боломж бүрдэх юм.
Өдгөө Копер боомтоор дамжин өнгөрч буй нийт ачааны 85% нь Словенийн хилийн чанад дахь Төв Европын бусад улсууд руу хүргэгддэг. Эдгээрт Унгар, Австри, Чех, Словак, өмнөд Герман болон өмнөд Польшийн зах зээлүүд голлон багтаж байна. Удирдах зөвлөлийн тэргүүн Истанбул болон Копер хотуудын хооронд шууд усан тээврийн шугам нээх нь хугацаа хэмнэж, нүүрстөрөгчийн ялгарлыг бууруулах ач холбогдолтойг нэмж дурдлаа.
