Кентакки муж улсын Луисвилл хотын оршин суугч, Канадын иргэн 59 настай Сандра Мэделин Ватсоныг АНУ-ын холбооны сонгуульд хууль бусаар санал өгсөн хэмээн тангарагтны шүүхээс буруутгаж, яллах дүгнэлт үйлдсэн талаар тус мужийн Баруун тойргийн Прокурорын газраас мэдээллээ.
Яллах дүгнэлтэд дурдсанаар, Ватсон нь өөрийгөө АНУ-ын иргэн биш гэдгээ бүрэн мэдсээр байж ерөнхийлөгч, дэд ерөнхийлөгч, Сенатын гишүүн эсвэл Төлөөлөгчдийн танхимын гишүүнийг сонгох холбооны сонгуульд санал өгсөн байна. Уг хэрэгтэй холбогдуулан тэрбээр Кентакки мужийн Баруун тойргийн Холбооны анхан шатны шүүхийн шүүгчийн өмнө анхны мэдүүлгээ өгчээ.
Хэрэв түүний гэм буруу шүүхээр тогтоогдвол нэг жил хүртэл хугацаагаар хорих ял шийтгэх хуулийн заалттай юм. АНУ-ын холбооны шүүхийн тогтолцоонд хугацаанаас өмнө магадлан суллах ойлголт байдаггүй бөгөөд шүүгч холбогдох хууль тогтоомж, ял оноох удирдамжийг харгалзан эцсийн шийдвэрийг гаргана. Гэсэн хэдий ч яллах дүгнэлт нь зөвхөн сэжиглэж буй хэрэг тул шүүхээр гэм буруутай нь бүрэн нотлогдох хүртэл түүнийг гэм буруугүйд тооцдог зарчимтай.
Энэхүү хэргийг АНУ-ын Цагаачлал, гаалийн хэрэг эрхлэх газрын Дотоодын аюулгүй байдлын мөрдөх алба (HSI) болон Холбооны мөрдөх товчоо (ФБТ) шалгаж байгаа бөгөөд АНУ-ын Иргэншил, цагаачлалын алба (USCIS) мөрдөн шалгах ажиллагаанд дэмжлэг үзүүлэн хамтран ажиллажээ. Энэ төрлийн зөрчил нь гадаадын иргэдийн хувьд цагаачлалын ноцтой үр дагавартай байдаг тул хуулийн байгууллагууд шалгалтыг үргэлжлүүлж байна.
