Португалын Лиссабон болон Порту хотод орон сууцны өндөр өртгийг эсэргүүцсэн мянга мянган иргэн мягмар гарагийн орой гудамжинд гарч тэмцлээ. Зохион байгуулагчдын мэдээлснээр Лиссабон, Порту хотуудын жагсаал болсон талбай тус бүрд 1000 гаруй хүн цугларч, хямралыг шийдвэрлэхийг засгийн газраасаа шаарджээ.
Үүнээс өмнө буюу мягмар гарагийн өглөө 0500 цагийн үед цагдаа нар гэнэтийн ажиллагаа явуулж, майхант хуарангуудыг хүчээр буулгасан байна. Лиссабоны Росио талбайд хагас сайн өдрөөс хойш барьсан 200 майхан болон Порту хотын талбайд 10 хоног байрласан хуаранг цэвэрлэх үеэр нийт 228 майхныг хураан авчээ. Ажиллагааны явцад 55 хүнийг баривчилсан бөгөөд Лиссабоны хуарангийн төлөөлөгч Карла Валадао цагдаагийн үйлдлийг хэт хэрцгий байсан хэмээн мэдэгдэв.
Харин Цагдаагийн газрын суперинтендант Сержио Соарес уг ажиллагааг тайван, зохистой явагдсан гэж үзэж байгаа ба баривчлагдсан 55 хүнийг шүүхэд дуудах болзолтойгоор суллажээ. Португал улсад үл хөдлөх хөрөнгийн үнэ 2017 оноос хойш хоёр дахин, түрээсийн үнэ мөн адил түвшинд өссөн нь иргэдийн амьжиргаанд хүндээр тусаж байна. Жагсагчид түрээсийн дээд хязгаарыг цуцалж, албадан нүүлгэх ажиллагааг хялбарчлах хуулийн төслийг эргүүлэн татахыг барууны төвч засгийн газраас шаардав.
Эсэргүүцлийн цуглаанд оролцсон 41 настай харилцаа холбооны зөвлөх Дебора Миранда хүмүүс эх орондоо тайван амьдрах боломж хумигдсаныг шүүмжилсэн бол 19 настай түүхийн ангийн оюутан Хорхе Пайшао нөхцөл байдлыг нийгмийн хямрал гэж тодорхойллоо. Орон сууцны асуудлаас үүдэлтэй бухимдал хөрш Испани улсад ч хурцдаж, дөрвөн долоо хоног үргэлжилсэн тэмцлийн улмаас 11 дүгээр сарын 29-нд ээлжит бус бүх нийтийн сонгууль зарлаад байна.
