Жимми Окессон 2030 онд ерөнхий сайд болох зорилтоо нотоллоо
Шведийн Ардчилсан намын дарга Жимми Окессон нам нь сөрөг хүчний эгнээнд шилжиж байгаа хэдий ч 2030 онд тус улсын ерөнхий сайд болох зорилтоосоо буцаагүй гэдгээ мэдэгдэв. Парламентын шинэ бүрэн эрхийн хугацаанд цагаачлалын эсрэг чиг баримжаатай тус нам бүрэн хэмжээгээр сөрөг хүчин болж ажиллана гэдгийг тэрбээр цохон тэмдэглэлээ. Өнгөрсөн дөрвөн жилд барууны төвч хүчнүүдтэй хамтарч байсан хэдий ч энэ нь намынх нь хувьд олон талаар шахалтад орсон, хүсээгүй буултууд хийсэн үе байсныг дурдсан байна. Тэр дундаа өндөр орлоготой иргэдийн татварыг бууруулсан эдийн засгийн бодлогыг хүлээн зөвшөөрөхөд хүрснийг онцлоод, цаашид жирийн иргэдийн орлогын татвар, хүнсний бүтээгдэхүүний НӨАТ болон шатахууны онцгой албан татварыг бууруулах, шүдний эмчилгээний салбарт өргөн хүрээтэй шинэчлэл хийхийг зорьж буйгаа илэрхийллээ.
Улирлын анхны их хэмжээний цасны улмаас шар түвшний сэрэмжлүүлэг гаргав
Шведийн цаг уур, ус шинжилгээний хүрээлэн пүрэв, баасан гарагуудад зарим бүс нутгаар их хэмжээний цас орох төлөвтэй байгаа тул шар түвшний сэрэмжлүүлэг гаргалаа. Вермланд, Свеаландын баруун өмнөд хэсэг болон Вестерботтен мужийн эргийн нутгаар цас ихээр орж, зам тээврийн хөдөлгөөнд хүндрэл үүсэх эрсдэлтэйг анхааруулав. Вермландад 5-15 сантиметр, зарим хэсгээр 20 сантиметр хүртэл цас хунгарлах төлөвтэй байгаа бол Вестерботтены эргээр 10-20 сантиметр, Шеллефтео хотын орчимд 30 сантиметрээс давсан цас орж болзошгүйг мэдээллээ. Цаг уурчид нойтон цасны улмаас зам дээр халтиргаа гулгаа үүсэх магадлалтайг сануулж, жолооч нарыг автомашины өвлийн дугуйгаа яаралтай солихыг уриаллаа.
Шведийн гүнжийн үнэт эдлэлийг Женевт дуудлагаар худалдана
Шведийн хаан Карл XVI Густавын эгч, талийгаач гүнж Биргиттагийн эдэлж хэрэглэж байсан ховор үнэт эдлэлийн цуглуулгыг Женев хотноо Sotheby's ордонд дуудлага худалдаанд оруулахаар болжээ. 2024 оны арванхоёрдугаар сард таалал төгссөн гүнжийн өвөөс сафир болон алмаазан шигтгээтэй хүзүүний зүүлт, хос ээмгийн хамт дуудлага худалдааны гол үзмэр болж байна. Энэхүү гоёлыг гүнжийн эх Сибиллагийн хуриманд бэлэглэж байсан түүхтэй бөгөөд Sotheby's үүнийг 300,000-аас 500,000 швейцар франк буюу 3.6-аас 6 сая орчим швед кроноор үнэлжээ. Үүнээс гадна гүнжийн угаалгын ёслолоор бэлэглэж байсан сувдан зүүлт болон ховор падпараджа сафир шигтгээтэй энгэрийн хатгуур дуудлага худалдаанд орох юм.
Кристерссонд засгийн газар байгуулах шийдлийг танилцуулах хугацааг сунгав
Шведийн парламентын дарга Андреас Норлен баруун төвийн Хамтарсан намын дарга Ульф Кристерссонд шинэ засгийн газар бүрдүүлэх асуудлыг танилцуулах хугацааг ирэх долоо хоногийн мягмар гараг буюу арваннэгдүгээр сарын 17 хүртэл сунгав. Төвийн намын удирдагч Элизабет Танд Рингквист Ерөнхий сайдын үүрэг гүйцэтгэгч Кристерссон болон Социал-демократ намын дарга Магдалена Андерссон нарыг Шведийг удирдах өрсөлдөхүйц цогц төлөвлөгөө танилцуулахыг хүссэнтэй холбоотойгоор энэхүү шийдвэрийг гаргажээ. Кристерссон одоогоор Хамтарсан нам, Христийн ардчилсан нам, Либерал нам болон Төвийн намын хооронд баруун төвийн эвсэл байгуулах боломжуудыг нээлттэй хэлэлцэж байгаагаа илэрхийлсэн байна.
Ноцтой гэмт хэрэг үйлдсэн иргэний харьяаллыг цуцлах төслийг парламентаар хэлэлцэнэ
Шведийн улсын амин чухал ашиг сонирхолд ноцтой хохирол учруулсан давхар харьяалалтай иргэдийн Шведийн харьяаллыг цуцлах боломжийг олгох Үндсэн хуулийн нэмэлт өөрчлөлтийг Риксдаг эцэслэн батлахаар төлөвлөж байна. Шведийн хууль тогтоомжийн дагуу Үндсэн хуульд өөрчлөлт оруулахын тулд сонгуулийн өмнө болон дараа хоёр удаа санал хурааж баталдаг журамтай бөгөөд тус хуулийн төсөл энэ удаад батлагдвал ирэх оны нэгдүгээр сарын 1-нээс мөрдөгдөж эхэлнэ. Хууль батлагдсанаар хуурамч мэдүүлэг өгч иргэншил авсан давхар харьяалалтай хүмүүсийн харьяаллыг цуцлах эрхзүйн орчин бүрдэхээс гадна гэмт бүлэглэлийн гишүүнчлэлийг хуульчлан хориглох үндэс тавигдаж, үр хөндөлтийг Үндсэн хуулиар хамгаалах эрх баталгаажих юм.
