Өмнөд Солонгосын Нэгдсэн штабын дарга, генерал Жин Ён Сон лхагва гарагт Агаарын цэргийн хүчний анги нэгтгэлд зочилж, улсынхаа агаарын батлан хамгаалах бэлэн байдлыг шалгалаа. Тэрбээр Сөүл хотоос зүүн өмнө зүгт 160 километрийн зайд орших Ечон мужийн Агаарын цэргийн 16 дугаар далавчид очсон бөгөөд дотооддоо зохион бүтээсэн KF-21 сөнөөгч онгоцонд сууж хамгаалалтын бэлэн байдлыг шалгасан байна.
Энэ үеэр генерал Жин Ён Сон KF-21 болон FA-50 сөнөөгч онгоцнуудын нэгдсэн нислэгийг удирдан чиглүүлжээ. Тэрбээр нисгэгчидтэй уулзах үеэрээ агаарын давуу байдлыг бүрэн хадгалж, болзошгүй аливаа эрсдэлд нэн даруй хариу арга хэмжээ авах чадвартай байхыг цэргийн алба хаагчдад үүрэг болгов.
Үүнээс гадна Жанжин штабын дарга баллистик пуужин илрүүлэх үүрэгтэй Агаарын цэргийн хүчний ангид очиж, Солонгосын агаар, пуужингийн довтолгооноос хамгаалах тогтолцоо (KAMD)-ны ажиллагааны бэлэн байдлыг хянажээ. Тэрбээр уг системийг улс орныг хамгаалах гурван тулгуурт тогтолцооны гол цөм хэмээн тодорхойлсон байна.
KAMD систем нь ирж буй баллистик болон бусад пуужинг эхний шатанд нь илрүүлж, устгах замаар хохирлыг хамгийн бага түвшинд барих зориулалттай юм. Гурван тулгуурт хамгаалалтын системийн үлдсэн хэсэгт урьдчилан цохилт өгөх 'Kill Chain' систем болон томоохон мөргөлдөөний үед Умард Солонгосын удирдлагыг саармагжуулах төлөвлөгөө багтдаг ажээ.
Генерал Жин Ён Сон цэргүүдэд хандан 'Энэ бол дайсны пуужингийн өдөөн хатгалгыг хамгийн түрүүнд илрүүлж, пуужингаас хамгаалах ажиллагааг эхлүүлдэг чухал анги нэгтгэл' хэмээн онцлоод, ямар ч төрлийн пуужинг цаг алдалгүй илрүүлэхийн тулд 24 цагийн турш сонор сэрэмжтэй байхыг даалгав.
