АНУ-ын Хууль зүйн яам АНУ болон Европын орнуудад цуврал халдлага үйлдэхээр төлөвлөсөн хэрэгт холбогдуулан Ираны дэмжлэгтэй гурван этгээдэд яллах дүгнэлт үйлдсэнээ мягмар гарагт зарлалаа. Сэжигтнүүд хамгийн сүүлд Их Британи дахь 'RAF Fairford' цэргийн баазад халдлага зохион байгуулахыг оролдсон бөгөөд тус байгууламжид АНУ-ын зэвсэгт хүчний анги нэгтгэлүүд байрлаж байжээ. Энэхүү хэрэгт Ираны иргэн Мохсен Мохажери, Иракийн иргэн Мохаммад Али аль-Хассани болон Иран, Иракийн давхар иргэншилтэй Мохаммад Бакер Саад Давуд аль-Саади нарыг албан ёсоор буруутгав.
Эдгээр сэжигтнүүд 'Исламын баруун гарынхны хөдөлгөөн' (HAYI) нэртэй шинэ бүлэглэлийн нэрийн өмнөөс Европт халдлагуудыг зохион байгуулсан гэж мөрдөн шалгах байгууллага үзэж байна. Тус бүлэглэл 2026 оны хавар Европ даяар үйлдсэн 18 халдлагын хариуцлагыг хүлээсний долоо нь Их Британид гарчээ. Эдгээр гэмт хэрэгт галдан шатаах, тэсрэх бөмбөг ашиглах ажиллагаанаас гадна Лондон хотод еврей гаралтай хоёр эрэгтэйн аминд хүрэх шахсан хутгатай халдлага багтаж байгаа юм. ФБТ-ийн дарга Каш Пател яллагдагчдыг Ираны Лалын хувьсгалыг хамгаалах корпус болон 'Катаиб Хезболла' бүлэглэлийг дэмжих зорилгоор 20 шахам халдлага төлөвлөсөн хэмээн мэдэгдлээ.
Мөрдөн байцаалтын явцад тогтоогдсоноор, сэжигтэн аль-Саади нь Нью-Йорк дахь хорих ангид өмнөх хэргээрээ шүүх хурал хүлээж байх хугацаандаа Их Британи дахь холбоотнуудтайгаа нууц код бүхий мессежээр харилцаж байжээ. Харин нөгөө хоёр сэжигтэн нь уг халдлагын зааварчилгааг Иран улсаас шууд өгч байсан байна. Их Британийн нутаг дэвсгэрт уг үйл явдалтай холбоотойгоор нийт долоон хүнийг баривчилсан бөгөөд хоёр британи иргэн шүүхэд дуудагдаад байгаа юм.
Их Британийн Глостершир гүнлэгийн нутагт байрлах цэргийн баазын ойролцоо сэжигтэй гурван фургон машин илэрснээр есдүгээр сарын 27-нд түгшүүрийн дохио дуугарч, тусгай ажиллагаа эхэлсэн байдаг. Мөрдөгчдийн мэдээлснээр аль-Хассани гэгч нь наймдугаар сарын 22-ноос эхлэн Их Британи дахь холбоотнууддаа мөнгө төлж, баазын хамгаалалтын бүсийг тагнуулжээ. Түүнчлэн есдүгээр сард шатахуунтай торхнууд, калийн хлорид зэрэг химийн бодис болон дэлбэрэлтэд ашиглах төмөр хэлтэрхийнүүдийг бэлтгэсэн нь тогтоогдсон байна. Машинуудыг түлш хүргэлт, усан сангийн үйлчилгээний зориулалттай мэтээр өнгөлөн далдалсан байжээ.
Халдлага үйлдэхээр зэхэж байсан машинуудын дор хаяж хоёр нь агаарын бааз руу дөхөх үедээ хамгаалалтын хаалттай тулгарч, маршрутаараа явах боломжгүй болсон аж. Улмаар есдүгээр сарын 27-ны үүрээр үдэшлэгээс буцаж явсан нутгийн тариачин сэжигтэй машинуудыг харж, цагдаад дуудлага өгснөөр аюулаас урьдчилан сэргийлж чаджээ. Хэдийгээр фургонуудаас бэлэн тэсрэх бодис олдоогүй ч их хэмжээний шатахууныг хураан авсан байна.
Уг хэргийн дараа АНУ цэргийн баазад бодит аюул занал учирсан гэх шалтгаанаар бүх стратегийн бөмбөгдөгч онгоцоо тус байгууламжаас эргүүлэн татжээ. АНУ-ын нисэх хүчин олон арван жилийн турш ашиглаж ирсэн тус баазаас сүүлийн саруудад 'B-1' болон 'B-52' загварын бөмбөгдөгч онгоцуудаараа Ойрх Дорнод дахь байлдааны даалгавруудыг гүйцэтгэж байсан юм. Харин Лондон хот дахь Ираны Элчин сайдын яам дээрх мэдэгдлийг 'үндэслэлгүй гүтгэлэг' хэмээн тодорхойлж, хэрэгт холбогдолгүй болохоо эрс няцаав.
