Дэлхийн эрүүл мэндийн байгууллага (ДЭМБ) Бүгд Найрамдах Ардчилсан Конго Улсад дэгдээд буй Эболагийн түүхэн дэх хамгийн том тархалтыг хязгаарлах зорилгоор хоёр шинэ вакцины эмнэлзүйн туршилтыг баталлаа. Тавдугаар сараас хойш тус улсад голчлон тархсан Бундибугио омгийн халдварын улмаас 5,300 гаруй хүн амиа алдаад байгаа тул шинжээчдийн баг энэхүү зөвшөөрлийг олгосон байна.
Энэхүү омгийн эсрэг зориулалтын вакцин, эмчилгээ одоогоор байхгүй тул нас баралтын түвшин 50 хувьд хүрч, эрүүл мэндийн байгууллагуудад хүндрэл учруулсаар иржээ. Өнгөрсөн сард эхлүүлсэн туршилтад Заир омгийн эсрэг зориулалттай 'Ervebo' вакциныг ашиглаж байсан бол шинэ туршилтаар Бундибугио омгийг онилсон бүтээгдэхүүнийг шалгах юм. Үр дүн нь 2027 оны эхээр тодорхой болно гэж ДЭМБ мэдэгдэв.
Уг туршилтыг Конго улсын Биоанагаахын судалгааны үндэсний хүрээлэн тэргүүлж, ДЭМБ болон бусад түншүүд дэмжиж байна. Вакциныг Оксфордын их сургууль, Энэтхэгийн Ийлдэс судлалын хүрээлэн болон 'Moderna' компани хамтран боловсруулжээ. ДЭМБ-ын тэргүүн Тедрос Адханом Гебрейесус вакцин чухал хэрэгсэл ч эрт оношлох, хавьтлыг илрүүлэх, тусгаарлах болон олон нийттэй хамтран ажиллах зэрэг батлагдсан арга хэмжээг орлохгүйг онцоллоо.
Африкийн Өвчнийг хянах, урьдчилан сэргийлэх төвийн мэдээлснээр уг омгийн халдварын 10,444 тохиолдол батлагдсан нь тус улсын түүхэн дэх хамгийн хурдацтай дэгдэлт болоод байна. Түүнчлэн Кени улсад есөн тохиолдол илэрч, хоёр хүн нас барсан бол Нигерид нэг тохиолдол бүртгэгджээ. Тедрос зарим орны тавьсан зорчих хязгаарлалтыг цуцлахыг уриалж, ийм хориг нь халдварын мэдээллийг ил тод мэдээлэх явцыг сулруулах эрсдэлтэйг анхааруулав.
Энэ хооронд Конгод ажиллаж байхдаа халдвар авсан Их Британийн эрүүл мэндийн ажилтныг тусгай эмчилгээнд хамруулахаар эх орон руу нь шилжүүлж байна. Өвчтөний биеийн байдал тогтвортой байгаа бөгөөд пүрэв гараг гэхэд Их Британид хүрэлцэн ирж, халдварт өвчний нарийн мэргэжлийн тасагт шилжих тухай засгийн газрын төлөөлөгч мэдэгдлээ. Тус улсын хүн амд учрах эрсдэл бага хэвээр байгааг албаныхан онцолжээ.
