Бүгд Найрамдах Чех Улсын нийслэл Прага хотноо 11 дүгээр сарын 9-нөөс 15-ны өдрүүдэд 13 дахь удаагийн '3Kino' Польшийн кино наадам эхлэхээр боллоо. Долоо хоног үргэлжлэх тус наадмын хүрээнд Польшийн орчин үеийн кино урлагийн төлөөлөл болсон 13 бүрэн хэмжээний уран сайхны киног толилуулахаас гадна театр, комеди, үзэсгэлэн, амьд хөгжим болон хүүхдэд зориулсан соёлын олон арга хэмжээ багтжээ.
Энэ удаагийн наадам найруулагч Мачей Кавальскийн 'Хүүхэлдэй' (Lalka) киногоор хөшгөө нээнэ. Болеслав Прусын сонгодог зохиолоос сэдэвлэн бүтээсэн эл бүтээл нь Польшийн кино түүхэн дэх хамгийн өндөр өртөгтэй төслүүдийн нэгд тооцогдож буй бөгөөд 19 дүгээр зууны Варшав хотын уур амьсгал, хайр дурлал, эрх мэдлийн хүсэл тэмүүлэл, нийгмийн анги давхаргын ялгааг харуулжээ. Гол дүрийг тус улсын нэрт жүжигчин Марчин Дорочиньски бүтээсэн байна.
Наадмын гол үзэл санаа нь 'эрх чөлөө' сэдэв байх бөгөөд уран бүтээлүүд түүхэн үйл явдлуудаас гадна өдөр тутмын амьдрал, хувь хүний сонголт, харилцаагаар дамжуулан эл ойлголтыг хөндөнө. Түүнчлэн наадмын хөтөлбөрт Польшийн Доод Силези мужийн онцлогийг онцолсон хэсэг багтажээ.
Дагалдах арга хэмжээний хүрээнд гэрэл зурагчин Рафал Павловскийн 'Авианы сүүдэр' үзэсгэлэн болон Польшийн алдарт найруулагч Анджей Вайдагийн мэндэлсний 100 жилийн ойд зориулсан кино зурагт хуудасны үзэсгэлэн олон нийтэд хүрэх юм. Наадмын үйл ажиллагаа Прага хотын хэд хэдэн танхимд зохион байгуулагдах бөгөөд тасалбарын худалдаа албан ёсоор эхлээд байна.
