Австралийн эдийн засаг саарах хэрээр залуу үеийнхэн хөдөлмөрийн зах зээлд хамгийн их дарамттай тулгарч болзошгүйг шинжээчид сэрэмжлүүллээ. Хөдөлмөрийн зах зээл ерөнхийдөө хумигдах үед залуу ажилтнууд түрүүлж цохилтод өртдөг зүй тогтолтой. Австралийн Статистикийн Товчооноос гаргасан есдүгээр сарын тайлангаар нийт ажилгүйдэл 4.7 хувьтай байхад залуучуудын дундах энэ үзүүлэлт 11.1 хувьд хүрчээ. Энэ нь цар тахлын өмнөх үеэс доогуур үзүүлэлт хэвээр байгаа хэдий ч ирэх саруудад нөхцөл байдал улам хүндэрч болзошгүйг илтгэж байна.
SEEK ажлын байрны цахим платформын ерөнхий эдийн засагч Блэйр Чапман 'Эдийн засаг сулрах үед залуу ажилтнууд хамгийн хүнд цохилтод өртдөг' хэмээн онцлов. Түүнчлэн Commonwealth Bank-ны эдийн засагч Харри Оттли залуучуудын ажилгүйдлийн түвшин бусад насны бүлгүүдээс илүү хурдтай өсөж байгааг тэмдэглэсэн юм. Ажлын зар нийтлэлүүдийн тоо тасралтгүй буурч байгаа бөгөөд томоохон аудитын дөрвөн компани эрэлт буурсантай холбогдуулан их, дээд сургууль төгсөгчдийг шинээр ажилд авах хэмжээгээ багасгасан байна.
Орон нутгийн бодит байдалд 24 настай Лаклан Ридделл сүүлийн гурван жилд супермаркетын тэрэг цуглуулахаас эхлээд жижиглэн худалдаа, үйлчилгээний салбар хүртэл хэдэн зуун ажлын байранд өргөдөл өгсөн ч тогтвортой ажил олж чадаагүй явна. Тэрээр хөгжмийн чиглэлээр диплом авсан ч хааяа нэг дуу, дүрсний техникчээр ажиллаж, Jobseeker тэтгэмжээр амь зууж буйгаа ярилаа. Залуус зөвхөн дуртай ажлаа голдог гэсэн ойлголт ташаа болохыг тэрээр дурдаад, ихэнх байгууллага зарын дагуу цахимаар хандахад хариу ирүүлдэггүйг нэмж онцолсон юм.
Залуусын ажилгүйдэл нэмэгдэж байгаа ч хөдөлмөрийн зах зээл дэх залуучуудын идэвх өндөр түвшинд хэвээр байна. Залуучуудын хөдөлмөр эрхлэлтийн түвшин 63.6 хувьд хүрсэн нь 2022 оны арваннэгдүгээр сарын дээд үзүүлэлт болох 66.7 хувиас буурсан ч 2019 оны дундаж 59.7 хувиас давсан хэвээр байгааг Оттли дурдлаа. Түүнчлэн залуусын хөдөлмөрийн зах зээлд оролцох хувь хэмжээ 2019 онд 67.7 хувь байсан бол одоогоор 71.4 хувь хүртэл өссөн үзүүлэлттэй байна.
Үүний сацуу хиймэл оюун технологи ажлын байрыг их хэмжээгээр үгүй хийнэ гэсэн болгоомжлол байсан ч Австралийн Хөдөлмөр эрхлэлт, ажлын байрны харилцааны яамны долоодугаар сарын судалгаагаар өргөн хүрээний сөрөг нөлөө хараахан гараагүй болохыг тогтоожээ. ChatGPT нэвтэрснээс хойш тус улсад 20-24 насныхны ажлын байрны өсөлт 25-аас дээш насныхнаас үл ялиг өндөр хэвээр байна. Гэсэн хэдий ч Qantas компани өнгөрсөн долоо хоногт хиймэл оюун ашиглах төлөвлөгөөгөө түргэтгэж, 850 ажлын байрыг цомхотгохоо зарласан нь зах зээлд өөрчлөлт гарч эхэлснийг харуулав.
Холбооны Ур чадвар, сургалтын сайд Эндрю Жайлс хиймэл оюун технологи нь ажлын байрыг бүрмөсөн автоматжуулахаас илүүтэй ажил гүйцэтгэх арга барилыг өөрчилж буйг онцлоод, ажилтнуудаа шилжилтийн үед чадавхжуулахад анхаарах шаардлагатайг сануулав. Түүнчлэн Австралид одоогоор 1 сая гаруй иргэн олон ажил давхар эрхэлж байгаа нь хөдөлмөрийн зах зээлд шинээр орж ирж буй залууст өрсөлдөөнийг улам нэмэгдүүлж байна.
