Австралийн Брисбен хотын өмнөд бүсийн Логанхолм дүүрэгт боксын тэмцээн зохион байгуулсан газрын гадаа машинаас гал нээсний улмаас дөрвөн хүн шархаджээ. Цагдаа нар бямба гаргийн оройн 8 цаг 15 минутад тус дүүргийн Брайантс гудамжинд орших үйлчилгээний төвийн гаднаас буун дуу гарсан дуудлагыг хүлээн авсан байна.
Гал нээсэн машин хэргийн газраас шууд зугтсан бөгөөд бууны суманд оногдож шархадсан дөрвөн хүнийг эмнэлэгт яаралтай хүргэжээ. Квийнслэндийн цагдаагийн дэд командлагч Крис Стрим хэргийн орчныг хүнд нөхцөлтэй байсныг тэмдэглээд, хэд хэдэн хүн суманд шархадсаныг албан ёсоор баталсан байна.
Уг газарт залуучуудыг хүчирхийллээс холдуулах зорилготой 'Logan City Titles Fight Night' боксын тэмцээн болж байсан тухай албаныхан онцлов. Логан хотын захирагч Жон Рэйвен уг хэрэг нутгийн оршин суугчдыг цочролд оруулсныг мэдэгдэж, гэр бүл болон олон тооны хүүхдүүд цугласан арга хэмжээнд ийм явдал тохиолдсонд харамсаж буйгаа илэрхийллээ.
Хэрэг үйлдсэн этгээдүүд оргон зайлсан хэвээр байгаа ч цагдаагийн байгууллага олон нийтэд шууд аюул занал учрахгүй гэж үзэж байна. Мөрдөгчид хэргийн талаар ямар нэгэн баримт, мэдээлэл бүхий иргэдийг цагдаагийн газарт яаралтай хандахыг уриаллаа.
