Казахстаны уран гулгалтын түүхэнд анхны олимпын медалийг авчирсан Денис Тен 2014 оны Сочийн өвлийн олимпоос хүрэл медаль хүртэж, эх орныхоо залуу үед дэлхийн шилдгүүдтэй эн зэрэгцэн өрсөлдөх боломжтойг батлан харуулсан билээ. Түүнийг 2018 онд цаг бусаар таалал төгссөний дараа үйл хэрэг, өв соёлыг нь мөнхжүүлэх зорилгоор Денис Тений нэрэмжит санг байгуулсан юм. Тус сан 2019 оноос хойш олон улсын дурсгалын тэмцээнийг жил бүр уламжлал болгон зохион байгуулж, өдгөө талийгаачийн ээж Оксана Тен тус сангийн тэргүүнээр ажиллаж байна.
Денис Тен 12 настайдаа улсынхаа насанд хүрэгчдийн аварга шалгаруулах тэмцээнд түрүүлж, улмаар 2008-2009 оны улиралд 16 настайдаа Беларуст болсон залуучуудын Гран-при тэмцээнд түрүүлснээр Казахстанаас Олон улсын тэшүүрийн холбоо буюу ISU-ийн тэмцээнд түрүүлсэн анхны тамирчин болж байв. Цаашлаад 2013 оны ДАШТ-ээс мөнгө, 2015 онд хүрэл медаль хүртэж, эх орноо уран гулгалтын газрын зурагт тод тамгалсан юм. Түүний энэхүү ололт амжилтыг өвлүүлэн үлдээх зорилготой уг тэмцээн нь зөвхөн дурсгал хүндэтгэл төдий биш, Казахстаны залуу тамирчдад хилийн чанадыг зорихгүйгээр эх орондоо дэлхийн шилдгүүдтэй өрсөлдөж, ур чадвараа ахиулах томоохон боломж олгож байна.
Энэхүү тэмцээн нь Олон улсын тэшүүрийн холбооны 'Чалленжер' цувралын албан ёсны хуваарьт багтдаг бөгөөд тамирчдад дэлхийн чансааны оноогоо ахиулах нөхцөлийг бүрдүүлдэг. Тэмцээний цар хүрээ өргөжихийн хэрээр Казахстанд уран гулгалтын шинэ сургуулиуд нээгдэж, академи байгуулагдсан нь спортын хөгжилд хүчтэй түлхэц өгчээ. Энэхүү системтэй хөгжлийн бодит үр дүн 2026 оны өвлийн олимпоор илэрч, тус улсын тамирчин Михаил Шайдоров эрэгтэйчүүдийн ганцаарчилсан төрөлд алтан медаль хүртсэн түүхэн амжилт үзүүлэв.
Энэ удаагийн найм дахь Denis Ten Memorial Challenge тэмцээн 10 дугаар сарын 7-ноос 10-ны өдрүүдэд Алматы хотын 'Халык Арена' ордонд болж, дэлхийн 20 гаруй орны 150 орчим тамирчин өрсөлдлөө. Эмэгтэйчүүдийн ганцаарчилсан төрөлд Александра Игнатова 226.01 оноогоор тэргүүлж, Өмнөд Солонгосын тамирчин Ким Ю Жэ 209.20 оноогоор мөнгө, Казахстаны тамирчин Софья Самоделкина 204.36 оноогоор хүрэл медаль хүртэв. Харин эрэгтэйчүүдийн ангилалд Владислав Дикиджи 312.79 оноогоор тэргүүлж, мөнгөн медалийг Глеб Лутфуллин 277.23 оноогоор, хүрэл медалийг Петр Гуменник 261.76 оноогоор тус тус хүртжээ. Бүжгийн хосын төрөлд Финландын Юулия Турккила, Маттиас Верслуйс нар алтан медалийн эзэд болов. АНУ-ын тамирчид болох Кэролайн Грин, Майкл Парсонс нар 180.37 оноогоор энэ төрөлд хүрэл медаль хүртсэн байна.
Тэмцээний үеэр Денис Тений урлагийн авьяас, ертөнцийг үзэх үзлийг хүндэтгэсэн 'Дурсамж тээсэн мөс' гала тоглолт болж өнгөрөв. Үзүүлбэрт уран гулгалтыг амьд хөгжим болон агаарын акробаттай хослуулснаас гадна Францын уран гулгагч, талийгаачийн олон жилийн анд Мари-Пьер Лере оролцсон юм. Мөн хиймэл оюун ухаанаар бүтээсэн Денис Тений аватар дүрс, түүний шүлгийн хэсгүүдийг толилуулж, тэмцээний сүлд дууг эгшиглүүлэв. Уг арга хэмжээг Денис Тений сан, Казахстаны Аялал жуулчлал, спортын яам, Алматы хотын захиргаа болон 'Самрук-Казына' сан хамтран зохион байгууллаа.
