Өмнөд Солонгосын төвийн бүсийн Чонжү хотод гурван өдөр үргэлжилсэн гоо сайхны олон улсын үзэсгэлэнгийн үеэр 100 орчим сая ам.долларын экспортын гэрээ байгуулсныг тус мужийн захиргаанаас ням гарагт мэдээллээ. Сөүл хотоос урагш 83 километрийн зайд орших Осон дүүрэгт пүрэв гарагаас бямба гараг хүртэл зохион байгуулсан тус арга хэмжээг 17,400 гаруй хүн үзэж сонирхсон байна.
Энэ удаагийн 13 дахь үзэсгэлэнд дотоод, гадаадын 254 гоо сайхны компани бүтээгдэхүүнээ дэлгэсэн бөгөөд дэлхийн 37 орноос уригдсан 200 худалдан авагч, мөн газар дээр нь бүртгүүлсэн 329 худалдан авагч хүрэлцэн иржээ. Экспортын зөвлөгөө, хэлэлцээрийн нийт дүн өмнөх жилийнхээс 14.3 хувиар өсөж 269.82 сая ам.долларт хүрснээс 96.95 сая ам.долларын бодит гэрээ байгуулагдсан байна.
Түүнчлэн арга хэмжээний үеэр салбарын 300 гаруй шинжээч, албаны хүмүүс семинарт оролцож, шинэ дэвшилтэт технологи, зах зээлийн хандлага болон бизнесийн шинэ боломжуудын талаар санал солилцлоо. Энэ нь тус үзэсгэлэн дэлхийн К-гоо сайхны бизнесийн гол платформ болон өргөжиж буйг харуулж байна.
Хойд Чүнчон мужийн захирагч Шин Юн Хан уг арга хэмжээгээр дамжуулан орон нутгийн компаниудын гадаад зах зээл дэх үйл ажиллагаа болон экспортыг дэмжиж, улмаар тус мужийг дэлхийн К-гоо сайхны төв болгохоо мэдэгдэв.
