Өмнөд Солонгосын Батлан хамгаалах яам пүрэв гарагт Умард Солонгосын Пуужингийн ерөнхий газрын даргын гаргасан мэдэгдлийг албан ёсоор няцаалаа. Пхеньяны тал Сөүлийн саяхан туршсан дуунаас хурдан гулсагч төхөөрөмж (HGV)-ийн амжилтад эргэлзэж буйгаа илэрхийлээд байсан юм.
Умард Солонгосын Пуужингийн ерөнхий газрын дарга Жан Чан Ха мэдэгдэхдээ, туршилтын дараах зурагт дуунаас хурдан төхөөрөмжийн гадаргуу дээр хөө тортог тогтоогүй байсан тул уг зэвсэг дуунаас хурдан нислэг үйлдэж чадаагүй байж болзошгүй гэж үзсэн байна. Тэрбээр Өмнөд Солонгосын талаас өнгөрсөн долоо хоногийн пүрэв гарагт нийтэлсэн гэрэл зургуудыг эш татан ийнхүү тайлбарлажээ.
Харин Сөүлийн Батлан хамгаалах яам уг шүүмжлэлийн хариуд тухайн төхөөрөмж нь хэт өндөр температурын хамгаалалтын дэвшилтэт технологитой учир дуунаас хурдан нислэгийн үед гадаргуу дээр тортог үүсэх боломжгүй гэж няцаав. Цаашид цэргийн удирдлагууд дуунаас хурдан уг төхөөрөмжийг зэвсэглэлд нэвтрүүлэх үйл явцтай холбоотой технологиудыг үргэлжлүүлэн хөгжүүлэхээр төлөвлөж байгааг яамнаас нэмж дурдлаа.
Өмнөд Солонгосын Батлан хамгаалахын эрдэм шинжилгээний хүрээлэн 10 дугаар сарын 8-ны өдөр дуунаас хурдан гулсагч төхөөрөмжийг анх удаа амжилттай туршсан талаар Хөх ордон өмнө нь мэдээлсэн юм. Хилийн бүсэд мина дэлбэрч гурван солонгос иргэн шархадсаны дараа хоёр Солонгосын хооронд хурцадмал байдал нэмэгдээд буй энэ үед Сөүл цэргийн чухал техникээ олон нийтэд ховор тохиолдлоор дэлгэсэн нь энэ байв.
Хөх ордны мэдээлснээр уг туршилт нь хэт өндөр температурын халуун тэсвэрлэх материал, чиглүүлэгч болон удирдлагын систем, түүнчлэн нам өндөрт тогтмол бус чиглэлээр маневрлах чадварыг шалгах зорилготой байжээ. Цэргийн салбарын энэхүү бүтээн байгуулалт нь Өмнөд Солонгосын батлан хамгаалах салбарын чадавхыг шинэ шатанд гаргахад чухал алхам болж байна.
