Саудын Арабын 'Ирээдүйн хөрөнгө оруулалтын санаачилга' (FII) олон улсын бага хурлыг ирэх жил болгон хойшлуулсан тухай албан ёсны цахим хуудсаар мэдээллээ. Ираны дэмжлэгтэй Йемений хусит босогчид тус хаант улсын нутаг дэвсгэрт үхлийн аюултай цохилт өгсөөр байгаа үед уг шийдвэр гарч байна.
Жил бүр уламжлал болгон зохион байгуулдаг энэхүү арга хэмжээ аравдугаар сарын 26-наас 29-ний хооронд эхлэх ёстой байв. FII хүрээлэнгийн гүйцэтгэх захирал доктор Маха Бинт Мишари Аль Сауд хэлэхдээ 'Энэ бол манай түншүүд, гишүүд, илтгэгчид болон нийт төлөөлөгчдийн өмнө хүлээсэн хариуцлага дээр үндэслэсэн шийдвэр юм' гэдгийг онцоллоо. Мөн тэрбээр 10 дахь удаагийн чуулга уулзалтыг төлөвлөсөн өндөр түвшинд зохион байгуулахын тулд дараа жилийн товыг тун удахгүй зарлана гэв.
Швейцарын Дэлхийн эдийн засгийн форумтай зүйрлэн 'Цөлийн Давос' хэмээн нэрлэдэг энэхүү төрийн дэмжлэгтэй чуулган нь газрын тосны хараат байдлаас ангижрах зорилготой юм. Саудын Араб аялал жуулчлал, спорт, технологийн салбарт хөрөнгө оруулж, эдийн засгаа шинэчлэхэд шаардагдах олон тэрбум долларыг татахын тулд хөрөнгө оруулалтын төлөвлөгөөгөө энд танилцуулдаг билээ. Уг хуралд 'Alphabet' болон 'Google'-ийн ерөнхийлөгч бөгөөд мэдээллийн ахлах захирал Рут Порат, 'Goldman Sachs' группийн ТУЗ-ийн дарга бөгөөд гүйцэтгэх захирал Дэвид Соломон, 'BlackRock' компанийн ТУЗ-ийн дарга бөгөөд гүйцэтгэх захирал Лоренс Финк зэрэг эрхмүүд оролцохоор төлөвлөөд байжээ.
Йемений олон улсад хүлээн зөвшөөрөгдсөн засгийн газрыг дэмжигч Саудын Араб тэргүүтэй эвсэл болон Ирантай холбоотой хусит бүлэглэлийн хооронд зэвсэгт мөргөлдөөн сүүлийн долоо хоногуудад улам хурцдав. 'Ансар Аллах' гэгддэг хуситууд тус улсын цэрэг, эрчим хүч болон иргэний дэд бүтэц, тэр дундаа Эр-Риядын олон улсын нисэх онгоцны буудалд цохилт өгч, наад зах нь 18 хүний аминд хүрч, хэдэн зуун хүнийг шархдуулсан байна.
Нийслэл хотод халдлага үргэлжилж буйтай холбогдуулан Эр-Рияд дахь төрийн байгууллагууд ажилтнууддаа гэрээсээ ажиллах зааварчилгаа өгчээ. Тухайлбал, Олон улсын валютын сан (ОУВС)-гийн бүс нутгийн төлөөлөгчийн газар байрладаг 99 давхар 'Kingdom Centre' цамхаг ажилчдаа ирэхгүй байхыг сануулсан бол АНУ-ын томоохон компаниудын оффисууд төвлөрдөг Хаан Абдуллагийн санхүүгийн дүүргийн байгууллагууд ч зайнаас ажиллах горимд шилжсэн байна.
