Франц улсад аравдугаар сарын 1-нээс 31-ний хооронд 'Cybermois' буюу кибер аюулгүй байдлын сарын аяныг зохион байгуулж байна. Тус улсын Cybermalveillance.gouv.fr байгууллагаас санаачилсан энэхүү арга хэмжээ нь бичил болон жижиг, дунд бизнес эрхлэгчдийг цахим гэмт хэргээс хамгаалах, аюулгүй байдлын мэдлэгийг дээшлүүлэхэд чиглэж байна.
'France Num 2026' судалгааны дүнгээс үзвэл жижиг, дунд аж ахуйн нэгжүүдийн 53 гаруй хувь нь мэдээллээ алдах болон хакердуулахаас ихээхэн болгоомжилж байгаа нь өмнөх оноос нэг хувиар өссөн үзүүлэлт юм. Иймээс цахим орчны хамгаалалт бизнес эрхлэгчдийн хувьд нэн тэргүүний асуудал болоод байна.
Энэхүү 14 дэх удаагийн аян нь Европын Холбооны Кибер аюулгүй байдлын агентлаг (ENISA)-аас хэрэгжүүлдэг Европын кибер аюулгүй байдлын сарын хүрээнд өрнөж байгаа юм. Уг санаачилгын гол зорилго нь цахим заналхийллийг таниулах, халдлагад өртсөн тохиолдолд авах арга хэмжээг хэвшүүлэх, Европ даяар нэгдсэн цахим соёлыг төлөвшүүлэхэд оршиж байна.
Мөн Францын Мэдээллийн системийн аюулгүй байдлын үндэсний агентлаг (ANSSI) 2025 онд 'MesServicesCyber' цахим платформыг нэвтрүүлсэн бөгөөд уг систем нь бизнес эрхлэгчдэд эрсдэлийн анхан шатны оношилгоо хийж, тодорхой зөвлөмжүүдийг нэг дороос авах боломжийг олгож байна. Түүнчлэн цахим халдлагад өртсөн тохиолдолд нөхөн төлбөр авахын тулд 72 цагийн дотор гомдол гаргах шаардлагатайг холбогдох байгууллагаас санууллаа.
