Баруун Австрали мужийн Перт хотын төвөөс зүүн өмнө зүгт 70 орчим километрийн зайд орших Кэйсбрүүк дүүргийн жимсний фермд буун дуу гарч, 44 настай эрэгтэй газар дээрээ амиа алдлаа. Хэрэг гарсны дараа зэвсэглэсэн цагдаагийн тусгай тасаг тухайн бүсэд аюулгүй байдлын томоохон ажиллагаа явуулж, улмаар 38 настай эрэгтэйг хүний амь бүрэлгэсэн хэрэгт буруутган баривчилсан байна.
Хэрэг гарах үед амиа алдсан эрэгтэйн хамтран амьдрагч болох 40 гаруй насны эмэгтэй бага насны хүүгийнхээ хамт байшинд байжээ. Тэд хэрэг болсон даруйд зугтан хөршийнхөө гэрт очиж, түргэн тусламж болон цагдаагийн байгууллагад дуудлага өгсөн байна. Цагдаагийн эх сурвалжийн мэдээлснээр хохирогч болон сэжигтэн нар бие биенээ таньдаг байсан аж.
Хэргийн газарт цагдаагийн найман автомашин, шинжээчдийн баг болон 'St John' түргэн тусламжийн гурван машин очиж ажиллав. Хэрэг гарсан хашаан дотор байсан автомашинд сууж байсан 38 настай сэжигтнийг цагдаа нар ямар нэгэн эсэргүүцэлгүйгээр баривчилжээ. Сэжигтэн нь галт зэвсэг эзэмших тусгай зөвшөөрөлгүй байсан бөгөөд амиа алдсан байшингаас нийт гурван ширхэг галт зэвсэг хураан авсан байна.
Мөрдөн байцаагч, ахлах сержант Стивен Клил тус хэргийг эмгэнэлтэй явдал хэмээн тодорхойлж, хохирогчийн гэр бүл, төрөл төрөгсдөд эмгэнэл илэрхийллээ. Баривчлагдсан этгээд даваа гарагт Армадейл дүүргийн шүүхэд шүүгдэх хуваарьтай байна.
