Канадын эрх баригчид Цагаачлал, дүрвэгсдийг хамгаалах журамд өөрчлөлт оруулж, орогнол хүсэх өргөдлийг хүлээн авах, хянан шийдвэрлэх тогтолцоогоо шинэчилснээ зарлав. Тус улсын Цагаачлал, дүрвэгсэд болон иргэншлийн албаны (IRCC) мэдээлснээр шинэ журам хэрэгжиж эхэлснээр үйл явц илүү ойлгомжтой болж, хугацаа хэмнэгдэнэ.
Энэхүү шинэчлэл нь дотоодод болон хилийн шалган нэвтрүүлэх боомтуудад гаргасан хүсэлтийг шийдвэрлэх үйл явцыг нэг мөр болгож, захиргааны ачааллыг бууруулах зорилготой юм. Өргөдлийг Цагаачлал, дүрвэгсдийн зөвлөлд (IRB) шилжүүлэхээс өмнө сайд холбогдох бичиг баримттай танилцах хугацаатай болж байна.
Түүнчлэн аюулгүй байдлын түнш байгууллагууд өргөдөл гаргагчийн эрүүгийн хариуцлага, аюулгүй байдал, хөтөлбөрийн шаардлага хангасан байдлыг урьдчилан шалгана. Ингэснээр зөвхөн бүрэн шалгагдсан хэргүүдийг шүүх хурлын түвшинд шилжүүлж, цаг алдахаас сэргийлэхээр боллоо.
Шинэ журмаар өргөдлийг буцаан татах, хүчингүй болсонд тооцох болон сэргээх харилцааг нарийвчлан тодорхойлсон байна. Түүнчлэн 18 нас хүрээгүй болон бие даан үйл явцыг ойлгох чадваргүй иргэдэд төлөөлөгч томилон туслахаар тусгажээ.
Канад, АНУ-ын Аюулгүй гуравдагч орны хэлэлцээрийн хүрээнд өргөдөл гаргагчдад үзүүлэх шаардлагыг мөн тодорхой болгосон байна. Шаардлага хангасан орогнол хүсэгчид өргөдлийнхөө хариуг хүлээх хугацаандаа Канадын хөдөлмөрийн зах зээлд ажиллах зөвшөөрлөө үргэлжлүүлэн авах эрхтэй хэвээр үлдлээ.
