Гэнэтийн осол, аюул тохиолдоход хүмүүс сандарч, хаана байгаа болон ямар тусламж хэрэгтэй байгаагаа тайлбарлахад хүндрэл учирдаг. Энэ эгзэгтэй мөчид түргэн тусламж хожимдох нь хүний амь нас эрсдэх ноцтой шалтгаан болдог тул яаралтай тусламжийн хариу арга хэмжээний хурд хамгийн чухалд тооцогдож байна.
Казахстан улсад одоогоор онцгой байдлын 112 дугаараас гадна галын аюулгүй байдлын 101, цагдаагийн 102, эмнэлгийн түргэн тусламжийн 103, хийн ослын 104 гэсэн салангид дугаарууд ажилладаг. Гэвч хэд хэдэн алба зэрэг шаардлагатай зам тээврийн осол зэрэг томоохон хэрэг явдлын үед иргэн ямар дугаарт хандахаа шийдэх бус, систем өөрөө зохицуулалтыг хийх ёстой гэж судлаачид үзэж байна.
Олон улсын туршлагаас үзвэл АНУ улсад 911 дугаараар дамжуулан цагдаа, гал, түргэн тусламжийг нэг дор дууддаг бол Европын холбооны орнууд 112 дугаарыг нэгдсэн байдлаар ашигладаг. Эдгээр тогтолцооны гол зарчим нь иргэн төрийн бүтцийг ойлгох шаардлагагүйгээр ганцхан дуудлага хийж, үлдсэн зохион байгуулалтыг систем цаанаа шуурхай шийдвэрлэхэд оршдог байна.
Казахстан улс энэ чиглэлд тодорхой ахиц дэвшил гаргаж, 112 алба болон бусад тусгай байгууллагуудын харилцан ажиллагааны шинэ дүрмийг баталжээ. Тус улсын иргэний хамгаалалтын хууль тогтоомжийн хүрээнд 112 дугаар нь цагдаа, түргэн тусламж, эмнэлгийн нисэх баг болон төрийн мэдээллийн сантай холбогдохоос гадна үүрэн холбооны операторууд дуудлага хийсэн иргэний байршлыг автоматаар дамжуулах үүрэг хүлээсэн байна.
Дэлхийн эрүүл мэндийн байгууллага (ДЭМБ) яаралтай тусламжийн холбооны болон зохицуулах төвүүдийг эмнэлэгт хүрэхээс өмнөх тусламж үйлчилгээний гол зангилаа гэж тодорхойлдог. Иймд мэдээллийг хурдан хүлээн авч, нөхцөл байдлыг зөв үнэлэн, холбогдох албадыг зэрэг илгээх нь тусламжийн салшгүй нэг хэсэг юм.
Цаашид нэгдсэн системийг улам боловсронгуй болгохын тулд дуудлага хийгч мэдээллээ олон албанд давтан хэлэх шаардлагагүй байх, диспетчерүүд болон аврах ангиуд нэгдсэн мэдээлэлтэй ажиллах нөхцөлийг бүрдүүлэх шаардлага тулгарч байна. Иргэдийн амь нас, аюулгүй байдлыг хамгаалахад ганц л дуудлага хангалттай байх хэмжээнд хүртэл төрийн үйлчилгээний уялдааг сайжруулах нь чухал болоод байна.
