Энэ оны эхний есөн сарын байдлаар Өмнөд Солонгосын орон нутгийн нисэх буудлуудаар тус улсад нэвтэрсэн гадаадын иргэдийн тоо өмнөх оны мөн үеэс 37.4 хувиар өсөж, 3.24 саяд хүрсэн талаар Солонгосын нисэх онгоцны буудлуудын корпорац (KAC) пүрэв гарагт танилцууллаа.
Нисэх буудлуудаар нарийвчлан авч үзвэл, Чонжү олон улсын нисэх буудлаар ирсэн зорчигчдын тоо 59.5 хувиар өссөн нь хамгийн өндөр үзүүлэлт болов. Мөн Кимхэ нисэх буудалд 47.9 хувь, Чежү нисэх буудалд 27.9 хувь, Тэгү нисэх буудалд 0.8 хувийн өсөлт тус тус бүртгэгдсэн байна. Харин нийслэл Сөүл орчмын бүсийг хариуцдаг Инчон болон Кимпо олон улсын нисэх буудлуудаар ирсэн гадаадын иргэдийн тоо дээрх хугацаанд ердөө 17.2 хувиар өсжээ.
Энэхүү өсөлтөд Тайвань улсаас зорчсон иргэд хүчтэй нөлөөлсөн бөгөөд тэдний тоо өмнөх оноос 60.4 хувиар өсөж, 960 мянгад хүрсэн байна. Ялангуяа Бусан хот орчмын Кимхэ олон улсын нисэх буудлаар дамжин ирсэн тайваньчуудын тоо 650 мянгад хүрсэн нь 76.7 хувийн өсөлт юм. Үүний зэрэгцээ Японтой холбосон шинэ нислэгүүд нээгдсэнтэй холбоотойгоор тус улсаас ирсэн зорчигчид 43.5 хувиар өсөж 450 мянгад хүрсэн бол Хятадын агаарын тээврийн компаниудын нислэг нэмэгдсэнээр Хятад улсаас ирсэн зорчигчид 29.4 хувиар өсөн 1.3 саяд хүрчээ.
Солонгосын нисэх онгоцны буудлуудын корпорацын ерөнхийлөгч Ким Вон Жүн нислэгийн чиглэлийг өргөжүүлж, гадаад зах зээлд чиглэсэн сурталчилгаа хийсний дүнд жуулчдыг орон нутгийн нисэх буудлуудаар шууд хүлээн авах боломж өргөжсөнийг онцлов. Түүнчлэн цаашид Соёлын яамны аялал жуулчлалын бүс хөгжүүлэх бодлогын хүрээнд Кимхэ, Тэгү, Чонжү, Янъян, Муан нисэх буудлуудын онцлогт тохирсон олон улсын нислэгийг нэмэгдүүлэхээр төлөвлөж байгааг тэрбээр нэмж дурдлаа.
