Казахстаны нүдний эмч Мухит Кулмаганбетов сүүлийн таван жилийг Хонконгт өнгөрүүлж, нүдний шар толбоны насжилттай холбоотой доройтлыг эрт шатанд нь илрүүлэх зориулалт бүхий шинэлэг төхөөрөмж бүтээжээ. Тэрбээр 'Entoptica Limited' компанийг хамтран үүсгэн байгуулж, гүйцэтгэх захирлаар нь ажиллаж байгаа бөгөөд тус хот түүнд эрдэм шинжилгээний ажил болон бизнесээ зэрэг эрхлэх таатай боломж олгосныг онцолсон байна.
Казахстаны хөдөө орон нутагт эмчийн гэр бүлд өссөн тэрбээр 2016 онд хараагаа алдах эрсдэлтэй тулгарч байсан нь нүдний мэдрэлийн доройтлын өвчлөлүүдийг судлах гол хөшүүрэг болжээ. Улмаар 2021 онд Их Британид докторын зэргээ хамгаалсныхаа дараа Хонконгийн Политехникийн их сургууль болон Канадын Ватерлоогийн их сургуулийн хамтарсан Нүд, хараа судлалын төвд ажиллахаар шилжин ирсэн түүхтэй.
Кулмаганбетовын удирдсан багийн хөгжүүлсэн 'SLOPE' нэртэй төхөөрөмж нь бүтцэт гэрэл болон квант оптикийн технологийг ашиглан нүдэнд хүрэлгүйгээр, түргэн хугацаанд үзлэг хийдгээрээ онцлогтой. Энэхүү технологи нь өвчтөний хараа мэдэгдэхүйц муудахаас өмнө шинж тэмдгийг илрүүлдэг бөгөөд хүүхэн харааг тэлэх эм дусаах шаардлагагүйгээр хоёр минутын дотор шинжилгээ хийх чадвартай ажээ.
Уг төхөөрөмж болон 'Entoptica' компани нь 'Hong Kong ICT Awards 2025' наадмаас гарааны бизнесийн тэргүүн шагнал болон төхөөрөмжийн ангиллын алтан цомыг тус тус хүртсэн байна. Кулмаганбетов уг технологийг хараагаа бүрмөсөн алдахаас сэргийлэх том боломж гэж тодорхойлжээ.
Тэрбээр өмнө нь Их Британи, Канад, Сингапур, Япон зэрэг орноос ирсэн саналуудаас татгалзаж, Хонконгийн судалгаа, санхүүжилт болон зах зээлийн холбоосыг сонгосон байна. Тэрбээр өдгөө эхнэрийнхээ хамт Хонконгийн амьдралын хэв маягт бүрэн дасаж, тус хотод цаашид ч үргэлжлүүлэн суурьшиж ажиллахаа илэрхийлжээ.
