Өмнөд Австрали муж улсын Аделаида хотын төвөөс зүүн тийш 41 километрийн зайд орших Тунгкилло орчимд хиймэл оюуны өгөгдлийн төв байгуулах төлөвлөгөөг нутгийн оршин суугчид эрс эсэргүүцэж байна. 'Quantum DC' компани 120 гектар талбайг хамарсан, 1200 мегаваттын хүчин чадалтай дата төв байгуулахаар санал болгоод байгаа юм. Уг бүтээн байгуулалтын эхний шатны ажлыг 2028 онд эхлүүлэхээр төлөвлөжээ.
Компанийн зүгээс аюулгүй байдлын үүднээс иргэдтэй уулзах хэлэлцүүлгээ хойшлуулсны дараа нутгийн оршин суугчид өөрсдөө санаачлан пүрэв гарагт Тунгкиллод, бямба гарагт зэргэлдээх Маннум хотод эсэргүүцлийн цуглаан зохион байгууллаа. Жагсагчдыг Либерал нам, Ногоон нам болон 'One Nation' намын төлөөллүүд дэмжиж үг хэлсэн байна.
Эсэргүүцлийг зохион байгуулагч Магдален Липпетт нутгийн иргэд хөгжил дэвшлийг эсэргүүцээгүй бөгөөд зэргэлдээх эрчим хүч хадгалах системийн төслийг дэмжиж ирснийг онцлов. Гэвч хиймэл оюуны энэхүү аварга төсөл нь газар тариалан, хөдөө аж ахуй, бүс нутгийн усны нөөцөд сөргөөр нөлөөлж, дуу чимээ болон гэрлийн бохирдол үүсгэнэ гэж тэд үзэж байна. Иймээс иргэд төслийг зогсоохын тулд хуулийн бүх арга хэрэгслийг дайчлахаа мэдэгдлээ.
Төслийн талбай болох 120 гектар нь Аделаида хотын төвийн гуравны нэгтэй тэнцэх хэмжээний газар бөгөөд энэ нь Илон Маскийн 'xAI' компанийн 100 хүрэхгүй гектар талбайтай 'Colossus' цогцолбороос ч том хэмжээтэй юм. Одоогоор 'Quantum DC' компани мужийн төлөвлөлтийн байгууллагад албан ёсны зөвшөөрлийн хүсэлтээ хараахан гаргаагүй байгаа бөгөөд олон нийтийн хэлэлцүүлгийг арваннэгдүгээр сарын 20, 21-ний өдрүүдэд зохион байгуулахаар товложээ.
'Quantum DC' компанийн гүйцэтгэх захирал Алби Томасси цахилгаан эрчим хүчний хэрэгцээний 80 орчим хувийг сэргээгдэх эрчим хүчний шугамтай холбогдох дэд станцуудаар хангах бөгөөд үлдсэн хувийг тус талбай дээр барих хийн цахилгаан станцаар нөхнө гэж тайлбарлав. Мөн төв нь Мюррей мөрөн болон гүний уснаас ашиглахгүй, борооны усыг хуримтлуулан эргүүлж ашиглах замаар хэрэгцээгээ хангана хэмээн байр сууриа илэрхийлжээ.
Төлөвлөлтийн сайд Ник Чампион аливаа дата төв байгуулах хүсэлт мужийн засгийн газрын эрчим хүч, усны нарийн шалгуур бүхий хатуу чанд хяналтаар орох ёстойг санууллаа. Парламентын сөрөг хүчний намууд төслийн байршлыг буруу хэмээн шүүмжилж байгаа бөгөөд Ногоон намын зүгээс шинэ дата төвүүдэд түр хугацааны хориг тавьж, нарийвчилсан судалгаа хийхийг уриалж байна.
