Их Британийн инээдмийн жүжигчин, хөтлөгч Рассел Брэндийн шүүх хурал Саутворкийн эрүүгийн шүүхэд 10 дугаар сарын 12-ны өдөр олон нийтийн анхаарлын дунд эхэлсэн билээ. Түүнийг 1999 оноос хойш 10 жилийн хугацаанд зургаан эмэгтэйн эсрэг хүчингийн гурав, бэлгийн дарамтын гурав, хүчирхийлэхийг завдсан нэг үйлдэлд буруутгаад байна. Одоогоор 51 настай Брэнд өөрт нь тулгасан бүх зүйл ангийг няцааж, өөрийгөө бүрэн гэм буруугүй хэмээн шүүхийн өмнө мэдэгдээд байна.
Шүүх хурлын гурав дахь долоо хоногийн лхагва гарагт Брэнд гэрчийн суудалд 4 цагийн турш сууж, мэдүүлэг өгөхдөө энэ хэрэг амьдралд нь хүнд цохилт болсныг онцоллоо. Тэрбээр 2023 онд 'Channel 4' телевизийн 'Dispatches' баримтат нэвтрүүлгээр өөрийнх нь эсрэг мэдээлэл цацагдсанаас хойш нэр хүнд нь бүрэн унасныг дурдсан юм. Түүнчлэн АНУ-ын поп дуучин Кэти Перритэй гэрлэж асар их алдар нэр олсон боловч одоо хэн ч түүнтэй харьцахыг хүсэхгүй болсныг шүүхэд тайлбарлав.
Улсын яллагч Риел Карми-Жонс түүнийг интернэт орчинд сая сая дагагчтай хэвээр байгаа тул хүмүүст бүрмөсөн хаягдсан мэтээр өөрийгөө өмгөөлөх нь үндэслэлгүй гэдгийг санууллаа. Брэнд 1999-2009 оны хооронд бэлгийн харилцаанд зөвшилцлийг чухалчилдаггүй байсан гэх дүгнэлтийг эрс үгүйсгэж, зөвшилцөл бол ямар ч маргаангүй анхдагч үнэт зүйл гэж өгүүлэв. Гэхдээ өөрийн алдар хүнд, амжилтыг ашиглан эмэгтэйчүүдтэй харилцахдаа хувиа хичээсэн үйлдэл гаргаж байснаа шүүхийн танхимд хүлээн зөвшөөрсөн байна.
Пүрэв гарагт Брэндийн эхнэр Лора шүүхэд мэдүүлэг өгч, нөхрөө халамжтай хань, сайн эцэг гэдгийг тодорхойлон өмгөөлсөн юм. Тэд 2006 онд танилцаж үерхэж эхэлсэн ч Брэндийн үнэнч бус байдлаас болж 2007 оны 2 дугаар сард салж байжээ. Хосууд 2015 онд харилцаагаа сэргээн, хоёр жилийн дараа гэрлэсэн бөгөөд бэлгийн дарамтын хэрэг гарсны дараа буюу 2024 оны эхээр нөхөр нь загалмайлсан тухай баримтыг прокурорын асуултад батлав.
Шүүх хурлын явцад яллагч тал Брэндийн 2007 онд хэвлүүлсэн 'My Booky Wook' намтар ном болон хэвлэлд өгсөн ярилцлагуудыг сөргүүлэн тавьж шалгалаа. Эхний хохирогч 1999 онд Хөдөлмөрийн намын хурлын үеэр Брэндийг ижил хүйстэн байх гэж бодон зочид буудлын өрөөндөө орохыг зөвшөөрсөн гэж мэдүүлсэн юм. Прокурор үүний хариуд жүжигчний өөрийнх нь номоос охидыг татахын тулд ижил хүйстэн шиг дүр эсгэж 15 жил туршсаны дараа үр дүнд хүрсэн гэх тэмдэглэлийг уншиж танилцуулав.
Баасан гарагт улсын яллагч эцсийн үгээ хэлэхдээ Брэндийг буруутгасан зургаан эмэгтэй бие биенээ огт танихгүй, энэ хэргээс ямар нэг хувийн ашиг хонжоо хайгаагүйг онцоллоо. Эдгээр эмэгтэйчүүд олон жилийн турш дотроо хадгалж, шаналж явсан үнэнээ хэлэхээр эрсдэл үүрэн шүүхийн өмнө зоригтой гарч ирсэн хэмээн тангарагтны шүүхэд тайлбарлав. Харин шүүгдэгчийн өмгөөлөгч Иан Винтер ирэх даваа гарагт хуралдаан үргэлжлэх үеэр эцсийн үгээ хэлэх хуваарьтай байна.
