АНУ-ын Чикаго хотын захад оршин суудаг 29 настай Парт Найи гэмт хэргийн хохирогчдод олгодог цагаачлалын визийг хууран мэхлэх замаар авах зорилгоор зэвсэгт дээрмийн халдлагуудыг зохион байгуулсан хэргээр холбооны шоронд хоёр жил хоригдох ял авлаа. Энэ тухай Иллинойс мужийн Хойд дүүргийн прокурорын газраас албан ёсоор мэдээлэв.
Мөрдөн шалгалтын баримтаас үзвэл, Парт Найи нь 2022-2024 оны хооронд Чикаго болон түүний ойролцоох бүс нутаг төдийгүй АНУ-ын бусад хотуудад байрлах кофены газар, ресторан, архины дэлгүүр, шатахуун түгээх станцуудад олон зуун хуурамч зэвсэгт дээрэм зохион байгуулжээ. Тэрбээр дэлгүүрийн эздэд мөнгө төлж байршлыг нь ашиглах, хуурамч дээрэмчдийг хөлслөх, мөн хуурамч хохирогчдыг зааварчилж бэлтгэх ажлыг гардан удирдсан байна. Энэхүү хууль бус сүлжээнд нэгдсэн хүмүүс цагаачлалын цагаач бус U виз авахын тулд Найид хүн бүр 5,000-аас 30,000 хүртэлх ам.доллар төлсөн байжээ.
АНУ-ын хуулиар U төрлийн визийг тодорхой төрлийн гэмт хэргийн золиос болсон бөгөөд хэргийг мөрдөх явцад хууль сахиулах байгууллагад тусалж хамтран ажилласан гадаадын иргэдэд олгодог журамтай. Хуурамч дээрмийн үеэр зэвсэгтэй этгээдүүд тухайн хохирогчдоос мөнгө шаардаж, дараа нь хохирогчид цагдаагийн байгууллагаас тодорхойлолт авч, улмаар АНУ-ын Иргэншил, цагаачлалын албанд (USCIS) виз хүсэх өргөдлөө хуурамчаар бүрдүүлэн илгээдэг байв.
Парт Найи энэ оны эхээр визийн луйвар хийхээр хуйвалдсан гэм буруугаа хүлээсэн бөгөөд аравдугаар сарын 22-ны өдөр холбооны шүүгч Мэри М. Роуланд түүнд хоёр жилийн хорих ял, 50,000 ам.долларын торгууль ногдуулав. Энэхүү холбооны мөрдөн шалгалтын хүрээнд одоогоор өөр таван хүн ял шийтгүүлээд байгаа бөгөөд хэргийг илрүүлэхэд USCIS, ФБТ болон Дотоодын аюулгүй байдлын мөрдөх алба хамтран ажиллажээ.
