Хүүхэд насны хамгийн дурсамжтай мөчүүдийн нэг бол найзуудтайгаа хамт гэртээ хонож, цагийг зугаатай өнгөрөөх явдал байдаг. Гэвч эцэг эхчүүдийн хувьд чимэглэл худалдан авах, тавилга зөөх, орон засахаас эхлээд маргааш нь цэвэрлэх хүртэл ихээхэн ажил төвөг уддаг билээ. Тэгвэл Чехийн Прага хотод төвтэй 'atelier stories' компани энэхүү асуудлыг шийдэж, бүрэн тохижуулсан шовгор майхантай үдэшлэгийг гэр бүлүүдэд санал болгож эхэллээ.
Эвент зохион байгуулалт, зочлох үйлчилгээний чиглэлээр ажиллаж байсан туршлагатай Яна Хрохова уг төслийг санаачлан эхлүүлжээ. Тэрээр эцэг эхчүүдэд нэмэлт ачаалал өгөхгүйгээр хүүхдүүдэд мартагдашгүй баяр бэлэглэх зорилгоор энэхүү үйлчилгээгээ зах зээлд гаргасан байна. Энэ нь төрсөн өдөр төдийгүй амралтын өдрүүд болон сургуулийн амралтаар найзуудаараа цугларах үед гэр дотроо хийх сонирхолтой бяцхан адал явдал болж чаддаг.
Гэр бүлүүд лусын дагина, илбийн академи болон спа үдэш гэсэн гурван үндсэн сэдвээс сонгох боломжтой юм. Шовгор майхан бүрт гудас, ор дэрний цагаан хэрэглэл, гоёлын дэр, сэдэвчилсэн дагалдах хэрэгсэл болон гэрлэн чимэглэл багтдаг. Захиалагчдын хүсэлтээр бүтээлч иж бүрдэл, гэрэл зургийн үйлчилгээг нэмэлтээр авах боломжтой бөгөөд ашигласан бүх хэрэглэлийг тогтмол цэвэрлэж, ариутган бэлтгэдэг байна.
Үйлчилгээний үнэ хоёр хүүхдийн нэг хоногийн хувьд 3,490 крон, харин баасан гарагаас даваа гараг хүртэл бүтэн амралтын өдрөөр авах бол 4,900 кроны төлбөртэй. Үүнд хүргэлт, угсралт болон буцаан хурааж авах бүх үйл явц багтсан бөгөөд Прага хот дотор хүргэлт үнэ төлбөргүй явагдана.
Үүнээс гадна уг үйлчилгээ нь хүүхдүүдэд бэлэглэх дурсамж дүүрэн бэлгийн ваучер хэлбэрээр худалдаалагддаг давуу талтай юм. Нэг жилийн хугацаанд хүчинтэй энэхүү эрхийн бичгийг төлбөр хийгдсэнээс хойш 24 цагийн дотор цахим шуудангаар илгээдэг байна. Мөн тус баг зөвхөн айл өрхөөр тогтохгүй хурим болон бусад арга хэмжээний үеэр хүүхдийн чөлөөт цагийг өнгөрөөх тусгай хэсгийг тохижуулдаг байна.
