Карибын тэнгисийн Гренада арлын нэгэн тоногдсон сууцанд Их Британийн иргэн 47 настай Эндрю Фредерик нас барсан байдалтай олдсон хэрэг хоёр орны хоорондын дипломат саатлаас үүдэн мухардалд орлоо. Уг хэрэг гарснаас хойш бараг 10 сар өнгөрсөн ч бүрэн хэмжээний мөрдөн шалгах ажиллагаа эхлэхгүй байгаа тул хохирогчийн ар гэрийнхэн болон тэдэнд тусалж буй сайн дурын байгууллага Их Британийн засгийн газрыг нэн даруй оролцохыг шаардав.
Фредерикийн цогцсыг 2024 оны 1-р сарын 4-ний өдөр олсон бөгөөд нас барсных нь дараа хийсэн задлан шинжилгээгээр түүнийг мохоо зүйлээр цохиулсан, хөлийн хумсыг нь зулгаах зэргээр тамласан, улмаар бусдын гарт амиа алдсан болохыг шүүх эмнэлгийн шинжээч албан ёсоор дүгнэсэн байдаг. Гэвч Гренада улсын цагдаагийн газар 'хүн амины хэрэг гарсан ямар ч үндэслэл байхгүй' гэж үзэн уг хэргийг хаасан нь хохирогчийн талынхныг ихээхэн бухимдуулсан юм.
Хилийн чанадад алагдсан хохирогчдын ар гэрт тусалдаг 'Murdered Abroad' санг үүсгэн байгуулагч Ив Хендерсон Их Британийн Гадаад хэргийн хороонд хандаж, хэрэгт хөндлөнгөөс оролцохыг уриаллаа. Тэрбээр 'Хүндрэл бэрхшээл байгааг ойлгож байгаа ч бараг 10 сар өнгөрчихөөд байхад энэ гэр бүлийг төөрөгдүүлсээр байна. Засгийн газар дипломат хүчээ зөв ашиглахгүй бол хилийн чанадад жилд алагдаж буй 60-80 гэр бүлд ямар найдвар үлдэх вэ' хэмээн байр сууриа илэрхийлэв.
Хохирогчийн ар гэрийнхний удаа дараагийн тэмцлийн үр дүнд Их Британийн албаныхан оролцож, цогцсыг 8-р сард эх оронд нь авчирчээ. Гэтэл Их Британид хийсэн хоёр дахь задлан шинжилгээгээр талийгаачийн тархи, зүрх, уушги тэргүүтэй бүх дотор эрхтэн болон хүзүүний зарим хэсэг алга болсон нь илэрсэн байна. Талийгаачийн цогцос Гренадагийн эрх баригчдын хяналтад зургаан долоо хоног байсан бөгөөд дотор эрхтэнүүд нь хаачсан, яагаад энэ талаар мэдэгдээгүй талаар одоо болтол ямар ч хариу тайлбар өгөөгүй ажээ.
Өнгөрсөн сард Их Британийн шүүх эмнэлгийн шинжээч Лондоны цагдаагийн газарт мөрдөн шалгалт явуулах хүсэлт тавьсан юм. Үүний дараа Их Британийн дээд комиссар уг асуудлыг Гренадагийн засгийн газрын дээд түвшинд тавьж, мөрдөн шалгалтад туслах тухай Их Британийн албан ёсны хүсэлтийг хүлээн авч хамтран ажиллана гэсэн аман зөвшөөрөл авчээ. Гэвч албан ёсны бичгийг хэдэн долоо хоногийн өмнө илгээсэн ч Гренадагийн тал гарын үсэг зурж батлаагүй хэвээр байна.
Скотланд Ярдын хүн амины хэргийн мөрдөгч асан Дэвид Жонстон Гренадагийн цагдаагийн хандлагыг шүүмжилж, хүн амины хэрэг илэрснээс хойших анхны 24 цаг нотлох баримтыг цуглуулахад хамгийн чухал байдаг алтан хугацааг алдсан болохыг анхааруулав. Хохирогчийн гэр бүлийнхэн уг хүсэлтэд даруй гарын үсэг зурж, Их Британийн цагдаатай хамтран ажиллахыг Гренадагийн ерөнхий сайд бөгөөд үндэсний аюулгүй байдлын сайдад хандан уриалж байна.
