Их Британийн Их Манчестер орчмын бүс нутагт цагаачид болон орогнол хүсэгчид амьдарч байна гэж таамагласан нийтийн эзэмшлийн орон сууцуудыг (HMO) санаатайгаар сүйтгэх хэрэг эрс нэмэгдлээ. Гэмт этгээдүүд эмзэг бүлгийн иргэд, тэр дундаа бага насны хүүхдүүдийг мөнгөөр хөлслөн халдлага үйлдүүлэхэд ашиглаж байна гэж Манчестер хотын цагдаагийн газар мэдээлэв.
Халдлага сүүлийн долоо хоногуудад голдуу Солфорд, түүнчлэн Стокпорт, Теймсайд зэрэг хотуудад төвлөрч, нийт 46 удаагийн гэмт үйлдлийн дуудлага бүртгэгджээ. Гэмт этгээдүүд цонх хагалах, хана болон хаалган дээр доромжилсон үгс, эсэргүүцлийн уриа шүршиж бичих, автомашиныг эвдэх зэргээр сүйтгэсэн байна. Уг байруудын зарим нь олон түрээслэгч суух зориулалттай HMO байшингууд байсан бол зарим нь эндүүрэгдсэн энгийн айл өрх байжээ.
Ахлах комиссар Маркус Ноден хэлэхдээ цагдаа нар уг дараалсан гэмт хэргийг онцгойлон шалгаж байгаа бөгөөд гэмт үйл ажиллагаандаа хүүхдийг ашиглаж буй этгээдүүдэд хуулийн хатуу хариуцлага хүлээлгэнэ гэдгийг анхааруулав. Одоогоор сэжигтнээр 42 настай эрэгтэй саатуулагдан байцаагдаж байгаагаас гадна өнгөрсөн долоо хоногт эвдлэн сүйтгэх хуйвалдаан зохион байгуулсан хэргээр 33, 39, 46 настай гурван хүнийг, түүнчлэн өмнө нь 13 настай хүүг баривчилсан байна.
Халдлагууд аравдугаар сарын 5-наас эхэлсэн бөгөөд цахим сүлжээгээр дамжуулан хүчирхийлэлд уриалах үйл ажиллагааг эрчимтэй түгээж байгааг цагдаагийн байгууллага тогтоожээ. Мөн орон нутгийн захиргаанаас гудамжинд хууль бусаар байрлуулсан цагаачдын эсрэг самбаруудыг хураан авч, энэ нь нийгэмд ташаа мэдээлэл тарааж, өс хонзон өдөөх эрсдэлтэйг сануулсан байна. Уг орон сууцуудад цагаачдаас гадна гэр бүлийн хүчирхийллээс хамгаалагдаж буй иргэд ч байрлаж байсан бөгөөд олон нийт гэмт үйлдлийг буруушааж байна.
