Өмнөд Солонгосын Сөүл хотын өмнөд хэсэгт орших Каннам дүүрэгт байрлах хоёр барилгад дараалсан гал гарч, нэг хүний зүрх зогсож, 18 хүн бэртэж гэмтсэн тухай албаныхан мэдээллээ. Цагдаагийн байгууллага уг хэргийг санаатайгаар гал тавьсан байж болзошгүй үндэслэлээр шалгаж эхэлжээ.
Эхний түймэр өдрийн 11:54 цагийн орчимд нэгэн барилгын гуравдугаар давхарт эхэлсэн бөгөөд гал сөнөөгчид 1:12 цагт галыг хэсэгчлэн дарсан байна. Энэ үеэр барилгад байсан 60 орчим хүнийг яаралтай нүүлгэн шилжүүлсэн ч 11 хүн бэртэж, тэдний нэг нь зүрх нь зогссон маш хүнд байдалд эмнэлэгт хүргэгджээ.
Үүнээс хойш хэдхэн минутын дараа буюу 12:01 цагт өмнөх барилгаас 200 орчим метрийн зайд байрлах өөр нэг барилгын дөрөвдүгээр давхарт хоёр дахь гал гарсан байна. Уг галыг 30 орчим минутын дараа бүрэн унтраасан бөгөөд нийт найман хүн утаанд угаартаж, гэмтэл авчээ.
Холбогдох албаныхан хэн нэгэн санаатайгаар гал тавьсан байж болзошгүй гэх дуудлага мэдээллийн дагуу газар дээр нь 115 гал сөнөөгчийг дайчлан ажилласан юм. Гал түймэрт өртсөн талбайнууд нь хоёр өөр компанийн оффис байсан тул цагдаагийн байгууллага уг хэргийг холбоотой байж болзошгүй гэж үзэж байна.
Онцгой байдлын албаны төлөөлөгч эхний ээлжинд хоёр гал хоорондоо шууд хамааралгүй харагдаж байсан ч шалтгаан нөхцөлийг цагдаагийн мөрдөн шалгалтын эцэст албан ёсоор тогтооно гэж мэдэгдэв. Одоогоор галын голомтод үзлэг хийж, нарийвчилсан шалгалт үргэлжилж байна.
