Өмнөд Австрали мужид амралтын өдрүүдэд хүчтэй шуурга дэгдэж, байгалийн аюулт үзэгдлийн улмаас олон бүс нутагт ихээхэн хохирол учирлаа. Бямба гарагийн орой гэхэд Порт-Огаста хот болон бусад газарт салхины эрч цагт 96-98 километр хүрч хүчтэй шуурчээ.
Мужийн Онцгой байдлын алба бямба гарагийн өглөөнөөс ням гараг хүртэл 24 цагийн хугацаанд нийт 60 дуудлага хүлээн авч, тусламж үзүүлсэн байна. Тус албаны төлөөлөгч Иан Бонитоны мэдээлснээр Порт-Огаста хотоос хагас цагийн дотор 20 орчим дуудлага ирсэн бөгөөд ихэнх нь унасан мод, байшингийн дээврийн хохиролтой холбоотой байв.
Аделаида хотын өмнөд хэсгийн Хайд-Парк дүүрэгт зоогийн газрын зогсоол дээр модны том мөчир хугаран унаж, байрлуулсан автомашинуудыг цөм цохин гэмтээжээ. Азаар осол болох үед автомашин дотор хүн байгаагүй тул хүний амь нас эрсдээгүй бөгөөд ач хүүхдийн суудал бүхий шинэ тэрэг ихэд эвдэрсэн байна.
Цаг уурын товчооны шинжээч Дэвид Крок Квинслэндийн халуун агаарын урсгал хүйтэн агаарын фронттой нийлснээр ширүүн бороо, аянга цахилгаантай хүчтэй шуурга үүссэн хэмээн тайлбарлав. Порт-Огаста хотоос баруун тийш 40 километрийн зайд байрлах малын ферм дээр 21 миллиметр бороо орж, мөндөр цохисон байна.
Бямба гарагийн үдээс ням гарагийн өглөөний 10 цагийн хооронд тус мужид нийт 12,000 орчим хэрэглэгчийн цахилгаан эрчим хүч түр тасарчээ. Одоогоор 500 гаруй хэрэглэгч гэрэл цахилгаангүй байгаа ба албаныхан гэмтлийг засахаар ажиллаж байна.
