Прага хотын Просек дүүрэг дэх Махалка толгойд 22 жилийн турш ажилласан бобслей замын цогцолбор 100 сая кроны өртөгтэй засварын дараа албан ёсоор нээгдлээ. Германы ‘Wiegand’ компанийн нийлүүлсэн шинэ дэд бүтэц ашиглалтад орсноор тус байгууламжийн үйлчлүүлэгч хүлээн авах багтаамж өмнөхөөсөө хоёр дахин тэлэв.
Анхны 700 метр урт зам нь зэвэрдэггүй ган ховилтой бөгөөд дугуйт чарга нь хонхор гадаргуугаар гулган явдаг зохион байгуулалттай юм. Харин шинээр ашиглалтад орсон 650 метр урт зам нь ‘Alpine Coaster 2.0’ нэг замт төмөр замын технологиор бүтээгджээ. Хоёр зам дээрх чаргууд цагт 45 километр хүртэл хурдлах боломжтой бөгөөд зорчигчид гар тоормосоор хурдаа өөрсдөө тохируулж болно.
Шинэ зам нь аюулгүй байдлыг бүрэн хангасан орчин үеийн системээр тоноглогдсон бөгөөд зорчигчид заавал суудлын бүс бүслэх шаардлагатай. Замын дагуу байрлуулсан 2,000 орчим соронзон мэдрэгч нь чаргуудын байршил, хурдыг тасралтгүй хянаж, шаардлагатай үед мөргөлдөхөөс сэргийлэн индукцийн тоормосыг автоматаар ажиллуулдаг байна.
Засварын хүрээнд шинэ кофе шоф болон харах тавцан байгуулсан бол хүүхдийн тоглоомын талбай, дээврийн амралтын бүсийг 2027 оны хавар бүрэн дуусгахаар төлөвлөжээ. Прага 9 дэх Просецка гудамжны 906/34b хаягт байрлах энэхүү төвд тасалбарын үнэ нэг удаа гулгахад 99 крон, таван удаагийнх 400 крон, арван удаагийнх 700 крон, хорин удаагийнх 1,300 крон, гучин удаагийнх 1,800 кроны үнэтэй байна.
Цогцолбор Даваагаас Пүрэв гарагт 10:00-22:00 цаг, Баасан, Бямба гарагт 10:00-23:00 буюу шөнийн 11:00 цаг хүртэл, Ням гарагт 10:00-20:00 буюу оройн 8:00 цаг хүртэл ажиллана. Нэг, тав, арван удаагийн тасалбар гурван сарын хугацаанд, харин 20 болон 30 удаагийн багц тасалбар нэг жилийн хугацаанд хүчинтэй юм.
