Миний тохиргоо

Люси Летбигийн хэрэгт оролцсон шинжээч эмч өөр хэргийг шүүхэд нөлөөлжээ

Нярайн сувилагч асан Люси Летбигийн хэрэгт шинжээчээр оролцсон эмч Питер Хиндмарш өөр шүүх хуралд гол дүгнэлтийг гаргасан тухай The Guardian мэдээллээ. Түүний ажилладаг их сургуулийн эмнэлэг нь 2023 оны гуравдугаар сард хүүхдэд инсулин хэрэглэх талаар аюулгүй зөвлөгөө өгч чадахгүй байна хэмээн түүнийг эмчлэх эрхийг нь хасаж байжээ. Гэвч уг шийдвэрийг долоон нярайг хөнөөсөн хэргээр бүх насаараа хоригдох 15 ял авсан Летбигийн шүүхийн тангарагтны бүрэлдэхүүнд мэдэгдээгүй өнгөрсөн юм.

Профессор Хиндмарш өөрийн эмчлэх эрх хасагдсан нөхцөл байдлыг нуун, 2023 оны наймдугаар сард Бирмингем хотын оршин суугч Дамион, Тамара Томас нарын эсрэг шинжээчийн дүгнэлт гаргажээ. Тэдний 12 настай хүү Жошуа 2022 оны арванхоёрдугаар сард чихрийн шижингийн хүндрэлээр амиа алдсан бөгөөд эмч эцэг эхийг нь эмнэлгийн тусламж цаг тухайд нь аваагүй хэмээн дүгнэсэн байдаг. Үүний үр дүнд ээж Тамара нь хүүхдээ үл хайхарсны улмаас хүний амь хохироосон хэрэгт гэм буруутайд тооцогдож гурван жил есөн сар, эцэг нь хоёр жил есөн сарын хорих ял сонсов.

Томасын гэр бүл 2017 онд Лондон хотоос Бирмингемд нүүн суурьшсан бөгөөд нийт долоон хүүхэдтэй байв. Тэдний том хүү 27 настай Алессандро эцэг эхийнхээ гэм буруугүйг нотлохоор давж заалдаж байгаа бөгөөд шинжээч эмчийг шалгагдаж байсныг огт мэдээгүй гэдгээ хэллээ. Хүү Жошуа 2022 оны арванхоёрдугаар сарын 9-ний өдөр бие нь огцом муудаж эхэлсэн бөгөөд найман цаг хагасын дараа эмнэлэгт хүргэгдсэн ч дараагийн өдөр нь нас баржээ.

Шүүхэд гаргасан тайландаа Хиндмарш 1983 оноос хойш хүүхдийн чихрийн шижингийн чиглэлээр суралцаж, 1991 оноос зөвлөхөөр ажилласан хэмээн дурдсан ч тухайн үед түүний эмчлэх эрх бүрэн цуцлагдсан байсныг нуужээ. Их Британийн хуулиар шинжээч эмч өөрийн нэр хүнд, дүгнэлтэд нөлөөлөхүйц аливаа сахилгын шалгалтыг шүүхэд цаг алдалгүй мэдэгдэх үүрэгтэй байдаг. Гэтэл Хиндмарш 2022 оны арваннэгдүгээр сарын 25-ны өдрөөс хойш Ерөнхий анагаах ухааны зөвлөлд (GMC) шалгагдаж эхэлсэн талаараа эрх баригчдад бүтэн хоёр жил гаруй хугацаанд мэдэгдээгүй байна.

Уг эмч хоёр өвчтөнд гэртээ инсулин хэрэглэхээ болихыг хувиараа зөвлөснөөс үүдэж нэг хүүхэд хүнд байдалд орсон тул эмнэлэг нь түүнийг хүүхдүүдэд ноцтой аюул учруулж болзошгүй гэж үзсэн юм. Гэвч тэрээр өөрийн хүсэлтээр 2024 оны арваннэгдүгээр сард эмчийн бүртгэлээс хасуулснаар албан ёсны сахилгын мөрдөн шалгалт дүгнэлтгүй хаагдсан ажээ. Үүний зэрэгцээ Летбигийн өмгөөлөгч давж заалдах шатны байгууллагад хандаад байгаа бөгөөд тэдний дурдсан өөр долоон шинжээч Хиндмаршийн өгсөн инсулины хордлогын дүгнэлтийг бүрэн няцааж байна.

The Guardian UKThe Guardian UK · Эх сурвалж