Их Британийн Татвар, гаалийн газар (HMRC) Татварын хэрэг хянан шийдвэрлэх олон улсын байгууллага буюу 'J5'-ын нэрийн өмнөөс Дэлхийн санхүүгийн салбарын түншлэлийн (GFIP) 2026 оны дээд хэмжээний уулзалтыг зохион байгуулав. Энэхүү уулзалтад олон улсын шинжээчид хуран цугларч, татварын луйвар, мөнгө угаах болон бусад санхүүгийн гэмт хэрэгтэй тэмцэх хамтын ажиллагааг бэхжүүлэхээр санал солилцлоо.
Санхүүгийн гэмт хэрэг улам бүр улс дамнасан шинж чанартай болж, шинэ дэвшилтэт технологийн тусламжтайгаар хууль бус хөрөнгийг шилжүүлэх, эх үүсвэрийг нуун дарагдуулах арга замууд нарийсч буйг уулзалтын үеэр онцлов. Тиймээс чуулганаар санхүүгийн тогтолцооны түвшинд ажиллагааны зохицуулалтыг чангатгах, улс хоорондын мэдээлэл солилцоог сайжруулах, төрийн болон хувийн хэвшлийн түншлэлийн бодит үр дүнг хангах гэсэн гурван үндсэн чиглэлд төвлөрлөө.
HMRC-ийн Гүйцэтгэх захирал бөгөөд Тэргүүн төрийн нарийн бичгийн дарга Жэй Пи Маркс 'Санхүүгийн гэмт хэрэг тасралтгүй хувьсан өөрчлөгдөж буй тул бидний хариу арга хэмжээ ч мөн даган шинэчлэгдэх ёстой. Засгийн газар, хууль сахиулах байгууллага, санхүүгийн салбарын давуу талыг нэгтгэснээр хууль бус сүлжээг дангаараа таслан зогсоохоос илүү их үр дүнд хүрнэ' хэмээн мэдэгдэв.
GFIP нь 2022 онд байгуулагдсанаасаа хойш төрийн байгууллага, хууль сахиулагчид, санхүүгийн байгууллагууд, финтек компаниуд болон тагнуулын нэгжүүдийг нэгтгэн ажиллаж байна. Түншлэгч байгууллагууд иргэний бүртгэл мэдээллийн хулгай, финтекэд суурилсан санхүүгийн луйвар, худалдаагаар дамжуулан мөнгө угаах зэрэг шинээр гарч ирж буй эрсдэлүүдийг хамтран үнэлж, мэдээлэл солилцох шинэ аргуудыг туршиж эхэлжээ.
Уг дээд хэмжээний уулзалтыг санаачлагч J5 бүлэгт Их Британийн HMRC, Австралийн Татварын алба, Канадын Орлогын агентлаг, Нидерландын Санхүүгийн тагнуул, мөрдөн шалгах алба болон АНУ-ын Дотоод орлогын албаны (IRS) Эрүүгийн мөрдөн шалгах газар багтдаг бөгөөд тэд мэдээлэл, дэвшилтэт технологийг хуваалцах замаар томоохон схемийг илрүүлсээр байна.
