Microsoft корпорацын хэд хэдэн гол системд томоохон хэмжээний саатал гарч, дэлхийн өнцөг булан бүрд үйл ажиллагаа явуулдаг олон байгууллага, хэрэглэгчдийг хамарсан ноцтой хүндрэл үүсгэлээ. Пүрэв гарагийн оройноос эхлэн баасан гараг дамнан үргэлжилсэн уг доголдлын улмаас сая сая хэрэглэгчийн Teams болон Outlook зэрэг цахим шуудан, харилцааны үйлчилгээнүүд доголдов. Дэлхий даяар 430 гаруй сая хүн Microsoft 365 багцыг ашигладаг бөгөөд Fortune 500 жагсаалтад багтдаг нийт компаниудын 90 гаруй хувь нь тус компанийн Copilot хиймэл оюун ухааны чатботыг өдөр тутмын үйл ажиллагаандаа хэрэглэж байна.
Down Detector цахим хуудсанд бүртгэгдсэнээр 74 улсын 130000 орчим хэрэглэгч систем ажиллахгүй байгаа тухай гомдлыг пүрэв гарагийн 18:00 цагийн орчимд гаргажээ. Хэрэглэгчид Word, Excel, PowerPoint зэрэг бичиг хэргийн хөтөлбөрүүд болон байгууллагын SharePoint, OneDrive үйлчилгээнд нэвтрэх боломжгүй болсон байна. Тус компани энэхүү явдлыг кибер халдлагатай холбоогүй бөгөөд автомат шалгалтын явцад хэд хэдэн серверийн үйл ажиллагаа гэнэт зогсож, системийн тохиргоо алдагдсанаас үүдсэн байж болзошгүй хэмээн мэдэгдлээ.
Системийн доголдол нь Их Британийн төрийн болон эрүүл мэндийн байгууллагуудад шууд нөлөөлж, үйл ажиллагааг нь саатуулжээ. Тухайлбал Үндэсний эрүүл мэндийн албаны цахим шуудангийн сүлжээ тасалдсанаар эмийн сангууд эмчийн бичсэн жорыг шалгаж чадахгүйд хүрч, иргэдийн эмийн дугаарлалт ихсэв. Түүнчлэн орон нутгийн цагдаагийн байгууллагууд иргэдэд хандан гэмт хэрэг, зөрчлийн мэдээллийг цахимаар бус зөвхөн утсаар мэдээлэхийг уриалсан бол сургуулиуд ирцийн мэдээг утсаар авахаас өөр аргагүйд хүрчээ.
Уг асуудал хиймэл оюуны томоохон компаниуд болох OpenAI болон Anthropic зэрэг технологийн платформуудын холболтын хэрэгслүүдэд мөн нөлөөлсөн байна. Үүнээс гадна Энэтхэгийн IndiGo, Akasa Air компаниудын харилцагчийн үйлчилгээ, Тайванийн хөрөнгө оруулалтын сангууд болон Японы тээврийн Sagawa Express байгууллагын цахим захиалгын сүлжээ саатжээ. Хөрөнгийн зах зээлийн зарим менежерүүд цахим шуудангаа шалгаж чадахгүйн улмаас арилжааны системд нэвтрэхэд хүндрэл үүссэн тухайгаа мэдээлэв.
Мельбурн хотын RMIT их сургуулийн дэд профессор Марк Грегоригийн тайлбарласнаар, уг саатал нь системийн сүлжээний давхаргад үүссэн буруу тохиргооноос үүдэлтэй бөгөөд энэ нь 2023 онд Австралийн Optus компанийн сүлжээ тасарсан явдалтай тун төстэй байна. Нэг хэсэг серверүүд унаснаар үлдсэн серверүүдэд хэт ачаалал ирж, улмаар шат дараалсан том доголдол бий болдог тул бизнесүүд нөөц хувилбартай байх ёстойг тэрээр санууллаа. Microsoft-ын удирдлагуудын зүгээс Европ, Хойд Америк дахь сэргээн засварлах ажил нааштай ахицтай байгаа бөгөөд асуудлыг бүрэн шийдвэрлэсний дараа дэлгэрэнгүй тайлан гаргахаа амлав.
