Индонезийн Борнео арал буюу Калимантан мужид ойн түймэр унтраахаар ажиллаж байсан нисдэг тэрэг голд унаж осолдлоо. Уг ослын улмаас хөлгийн багийн бүрэлдэхүүнд байсан Австралийн хоёр иргэн эсэн мэнд гарч чадсан бол Индонезийн нэг иргэн сураггүй алга болсон тухай тус улсын Гамшгийн хор уршгийг арилгах үндэсний агентлаг (BNPB) мэдээлэв.
Бичлэгээс харахад нисдэг тэрэг Өмнөд Калимантан мужийн гол дээрээс ус татаж байхдаа удирдлагаа алдаж, улмаар гол руу шууд унасан байна. Нутгийн иргэд ослын газарт тусалж, нисдэг тэрэгний сэгийг уснаас гаргахад дэмжлэг үзүүлжээ. Амьд гарсан Австралийн хоёр иргэнд эмнэлгийн тусламж үзүүлж буй бөгөөд эрэн хайх, аврах албаныхан сураггүй болсон ажилтныг хайхаар ослын газар луу хөдөлсөн байна.
Энэхүү нисдэг тэрэг нь Индонезийн эрх баригчидтай гэрээ байгуулан, байгалийн гамшигтай тэмцэх ажилд тогтмол дайчлагдан ажиллаж байжээ. Нийслэл Банжармасинаас түймрийн бүс рүү ниссэний дараа осол гарсан бөгөөд албаныхан ослын шалтгааныг тодруулахаар нарийвчилсан шалгалт явуулж эхэлсэн байна. Өнгөрсөн долоо хоногт Төв Калимантанд өөр нэг ус тээвэрлэгч нисдэг тэрэг осолдож, гурван хүн амиа алдсан юм.
Индонези улс сүүлийн арван жилийн хамгийн хүнд ойн болон хөрсний түймрийн улиралтай нүүр тулаад байна. Сансрын тандалтын мэдээгээр энэ оны есдүгээр сар хүртэлх хугацаанд 1.9 сая гаруй га талбай түймэрт шатжээ. Түймрээс үүссэн хорт утааны улмаас тус улсад амьсгалын замын цочмог халдварын 400,000 гаруй тохиолдол бүртгэгдсэн бөгөөд гал түймэртэй тэмцэх ажилд 100,000 гаруй албан хаагч дайчлагдан ажиллаж байна. Цагдаагийн байгууллагаас санаатай болон санамсаргүйгээр гал тавьсан хэрэгт холбогдуулан 240 гаруй иргэн, 20 аж ахуйн нэгжийг сэжиглэн шалгаж байгаа юм.
