Бямба гарагт Польшийн өмнөд хэсгийн Краков хотын төв талбайд зэвсэгт халдлага гарч, наад зах нь зургаан хүн амиа алдаж, 16 хүн хүнд, хөнгөн шархадлаа. Орон нутгийн цагаар 15:00 цагийн үед (GMT-ээр 1400 цаг) сэжигтэн төв талбай руу автомашинтай нэвтэрч, хүмүүс рүү машин дотроосоо гал нээжээ. Цагдаа нартай буудалцах үеэр шархадсан 25 настай польш эрийг саатуулан эмнэлэгт хүргэсэн байна.
Халдлага үйлдсэн этгээд автомат буугаар талбайн хэд хэдэн байршилд санамсаргүй байдлаар иргэд рүү галласан бөгөөд суманд цагдаагийн алба хаагчид өртжээ. Цагдаагийн дарга Марек Бороны мэдээлснээр амиа алдсан зургаан хүний дунд Польшийн гурван эмэгтэй болон Их Британийн нэг иргэн байсан бол хоёр хүнийг хараахан тогтоогоогүй байна. Шархадсан 16 хүний тав нь Австри, Герман, Португал, Орос, Их Британи зэрэг орны жуулчид байсныг албаныхан баталлаа.
Мөрдөн шалгах явцад цагдаагийн байгууллага сэжигтний гэрээс хоёр эмэгтэй, нэг эрэгтэйн цогцсыг олсон бөгөөд тэднийг ойрын төрөл садан нь байх магадлалтай гэж үзэв. Сэжигтний оршин суудаг байшин нь Краков хотоос зүүн хойд зүгт 150 километр (93 миль) зайд орших Островец-Свентокшиски хотод байрладаг байна. Дотоод хэргийн сайд Марчин Кервинский гэмт этгээд нь хэт барууны үзэл баримтлалтай, радикал хандлагатай нэгэн байсныг тэмдэглэлээ.
Цэргийн дүрэмт хувцас, сум үл нэвтрэх хантаазтай этгээдийн унаж явсан автомашинаас олон тооны зэвсэг, сум хэрэгслийг хураан авсан байна. Ерөнхий сайд Дональд Туск уг хэргийг урьд өмнө тохиолдож байгаагүй харгис террорист халдлага хэмээн нэрлэж, улс орон даяар хоёр хоногийн эмгэнэл зарлалаа.
Нийслэл Варшав хотоос 250 километр (155 миль) зайд орших 800,000 гаруй оршин суугчтай Краков хот нь тус улсын хоёр дахь том хот юм. Жуулчдын хөл тасардаггүй энэхүү түүхэн хотод гарсан халдлагатай холбогдуулан Европын холбоо болон Германы удирдагчид Польшийн ард түмэнтэй хамт байгаагаа илэрхийлжээ.
