Баруун Австрали мужийн Перт хот дахь өсвөр насныхныг саатуулах 'Бэнксиа Хилл' төвд баасан гаргийн орой гурван хоригдогч дээвэр дээр гарсан хэрэг гарав. Энэ нь тус хорих газарт томоохон үймээн дэгдсэнээс хойш бараг жилийн дараа давтагдаж буй хэрэг явдал болж байна.
Агаарын бичлэгээс үзвэл хорих төвийн дээврийн тодорхой хэсэг, хоёр цонх болон агааржуулалтын систем эвдэрч сүйдсэн нь тодорхой харагдаж байв. Мөн дээвэр дээр байсан хоригдогчдын нэг нь тоосготой төстэй зүйлийг газар руу шидсэн бөгөөд тэд хоорондоо ярилцаж суух үе ч ажиглагджээ.
Үйл явдалтай холбогдуулан үймээн самууны эсрэг хамгаалалтын хувцас, бамбайгаар тоноглогдсон ажилтнууд бэлэн байдалд ажиллаж, зарим нь өсвөр насныхантай яриа хэлэлцээ хийсэн байна. Мужийн Хууль зүйн яамны хэвлэлийн төлөөлөгч оройн 18:00 цагийн орчимд гурван өсвөр насны хүүхэд дээвэр дээр байгааг батлаад, ажилтнууд нөхцөл байдлыг шууд хянаж буй тул олон нийтэд ямар нэгэн аюул учирхгүй гэж мэдэгдлээ.
'Бэнксиа Хилл' нь тус мужийн 10-аас 17 насны охид, хөвгүүдийг байрлуулдаг гол хорих газар юм. Өнгөрсөн оны арваннэгдүгээр сарын сүүлээр дор хаяж зургаан хүүхэд дээвэр дээр гарч, тэдний гурав нь шөнийг дээвэр дээр өнгөрүүлж байсан бөгөөд үүний дараа барилгын дээврийн зарим хэсэгт нэмэлт хашаа суурилуулж байжээ.
Тус хорих газарт сүүлийн жилүүдэд хэд хэдэн удаа үймээн гарч байсан түүхтэй. Одоогоор эрх баригчид энэ онд дуусгахаар 67 сая ам.долларын засвар, шинэчлэлийн ажлыг гүйцэтгэж буй бөгөөд өндөр эрсдэлтэй хоригдогчдод зориулсан 156 сая ам.долларын өртөгтэй шинэ төвийг 2028 онд ашиглалтад оруулахаар төлөвлөн барьж байна.
