Хоёр тамирчин өөд өөдөөсөө хурдтай гүйж ирэн хүчтэй мөргөлддөг 'Run Nation' болон ээлжлэн бие биеийнхээ нүүрийг алгаддаг 'Power Slap' зэрэг шинэ тэмцээнүүд амь насанд шууд аюул учруулах эрсдэлтэй болохыг мэдрэлийн эмч, тархины доргилтын шинжээч доктор Ровена Моббс Австралийн парламентын сонсголын үеэр мэдэгдэв. Түүний үзэж буйгаар эдгээр тэмцээний цохилт нь хүнийг хамгаалалтгүй үед нь санаандгүй цохих буюу 'хулчгар цохилт'-той (king-hit) адил уршигтай бөгөөд ямар ч дүрэм, зохицуулалтаар аюулгүй болгох боломжгүй ажээ.
Шинэ Өмнөд Уэльс мужийн парламент өнгөрсөн наймдугаар сард тусгай хороо байгуулан, оролцогчдын аюулгүй байдлыг хангах үүднээс шинээр гарч ирж буй дээрх тэмцээнүүдийг тулааны спортын ангилалд албан ёсоор оруулах шаардлагатай эсэхийг судалж эхэлсэн юм. Тухайлбал, өнгөрсөн онд Шинэ Зеландад 19 настай залуу интернэтээр тархсан 'run it straight' сорилтоос сэдэвлэсэн мөргөлдөх тоглоомын үеэр толгойдоо хүнд гэмтэл авч, харамсалтайгаар амиа алдсан тохиолдол гарчээ. 'Run Nation'-ийг зохион байгуулагчид уг сорилыг аюулгүй спорт болгон хөгжүүлсэн хэмээн мэдэгддэг ч эмнэлгийн мэргэжилтнүүд эсрэг байр суурьтай байна.
Шинэ Өмнөд Уэльс мужийн Дээд шүүх есдүгээр сард 'Run Nation' тэмцээнийг тулааны спорт мөн гэж шийдвэрлэн, Сиднейд болох гэж байсан тэмцээнийг цуцалсан Мужийн Тулааны спортын газрын (CSA) шийдвэрийг хэвээр үлдээсэн билээ. Гэвч эмнэлгийн зөвлөх зөвлөл зөвшөөрөл олгосноор уг тэмцээнийг арваннэгдүгээр сарын 28-ны өдөр зохион байгуулахаар дахин товложээ. Харин 'Power Slap' тэмцээн Австралид одоогоор албан ёсоор зохиогдоогүй байгаа юм.
Мужийн Тулааны спортын газрын дарга Даррен Кейн сонсголын үеэр шинэ тулааны спортуудыг заавал зохицуулалтад хамруулж, түргэн тусламжийн машин болон эмнэлгийн мэргэжилтнүүдийг газар дээр нь байлгахыг шаардах нь зүйтэй гэдгийг онцлов. Тэрбээр зохицуулалтгүй тэмцээнд тамирчдын амь нас зөвхөн азаас шалтгаалдаг бол зохицуулалттай тэмцээнд эмч, мэргэжилтнүүд доргилтын эсрэг сургалтад хамрагдсан байдгийг тайлбарлалаа.
Нөгөө талаас албан ёсны зөвшөөрөлгүйгээр тулаан зохион байгуулдаг 'Get That Guap' клубийн үүсгэн байгуулагч Петеро Таремва сонсголд үг хэлэхдээ зөвшөөрөл, даатгал, түргэн тусламжийн машины зардлууд нь гарааны түвшний зохион байгуулагчдад маш хүнд тусдагийг дурджээ. Тэрбээр өөрсдийн арга хэмжээнд дижей хийдэг сувилагч ажиллуулдаг тул ноцтой бэртэл гараагүй гэж мэдэгдсэн ч парламентын гишүүд үүнийг хангалттай хамгаалалт биш гэж үзэв.
Доктор Ровена Моббс хөлбөмбөг болон уламжлалт тулааны спортод олон арван мянган удаагийн жижиг доргилт хуримтлагдсаар хожим тархины хүнд эмгэг үүсгэдэг бол эдгээр шинэ тэмцээний хүчтэй цохилт нь цөөн тохиолдлоор ч насан туршийн тархины өвчлөл үүсгэх магадлалтайг анхаарууллаа. Оролцогчид өөрсдийгөө хамгаалах боломжгүй, шууд хамгийн эмзэг цэгтээ цохилт авдаг нь үхэлд хүргэх аюултай тул дүрмийг хэрхэн өөрчилсөн ч аюулгүй болгох аргагүйг тэрбээр цохон тэмдэглэв. Парламентын хянан шалгах хороо эцсийн тайлан дүгнэлтээ арванхоёрдугаар сард танилцуулахаар ажиллаж байна.
