Умард Солонгосын эрх баригчид зэвсэг техник танилцуулах арга хэмжээний үеэр дайрагч нисгэгчгүй төхөөрөмж, далавчит пуужин туршсан тухай тус улсын төрийн мэдээллийн агентлаг баасан гарагт мэдээллээ. Удирдагч Ким Жон Ун орчин үеийн дайны тактик өөрчлөгдөж буйг онцлоод, нисгэгчгүй онгоц болон хиймэл оюуны технологийг цэрэгт нэвтрүүлэх ажлыг хурдасгахыг үүрэг болгов. Тэрбээр 'Хүч чадал бол энх тайвны үндэс, харин энх тайван зөвхөн хүч чадлаар баталгаажна' хэмээн мэдэгдсэн байна.
Энэхүү танилцуулгад амиа золиослогч нисгэгчгүй онгоц, агаар-газар ангиллын пуужин тээгч нисдэг хэрэгсэл, 600 миллиметрийн пуужинт төхөөрөмжүүд багтжээ. Туршилтын үеэр нисгэгчгүй төхөөрөмж болон далавчит пуужингууд арлын байг зуун хувийн оновчтой устгасан тухай төрийн хэвлэл тэмдэглэв. Пхеньян сүүлийн үед хиймэл оюунд суурилсан удирдлагатай торпед, дундын тусгалтай дуунаас хурдан пуужин зэрэг дэвшилтэт зэвсгийг дараалан туршаад байна.
Үүнээс гадна Умард Солонгос Вонсан хотын орчмоос зүүн тэнгисийн зүг арваад ойрын тусгалын баллистик пуужин харвасныг Өмнөд Солонгосын зэвсэгт хүчин илрүүлжээ. Тус пуужингууд 250 километр буюу 155 миль орчим нисэж унасан бөгөөд Сөүл болон АНУ-ын тал нарийвчилсан үзүүлэлтийг нь шалгаж байна. Өмнөд Солонгосын Үндэсний аюулгүй байдлын зөвлөл уг үйлдлийг НҮБ-ын Аюулгүйн Зөвлөлийн тогтоолыг ноцтой зөрчсөн үйл явдал гэж буруушаав.
Хилийн цэрэггүй бүсэд мина дэлбэрч, Өмнөд Солонгосын гурван цэрэг шархадсанаас хойш хоёр улсын харилцаа эрс муудсан билээ. Тус миныг Умард Солонгос жилийн өмнө зориуд суурилуулсан болохыг НҮБ-ын хамтарсан шалгалтаар тогтоож, хэлэлцээрийн зөрчил хэмээн уучлалт гуйхыг Сөүл шаардсан юм. Хоёр Солонгос 1953 онд гал зогсоох хэлэлцээр байгуулснаас хойш энхийн гэрээ байгуулаагүй тул хууль зүйн хувьд өнөөг хүртэл дайны байдалтай байна.
