АНУ-ын Хууль зүйн яам Аляска муж улсын Сенатын суудлын сонгуульд Бүгд найрамдах намаас одоогийн сенатор Дэн С. Салливан цөөн саналаар ялагдвал дүнг нь хүчингүй болгох шаардлага бүхий шинэчилсэн нэхэмжлэлийг шүүхэд гаргав. Энэхүү маргаан нь АНУ-ын Конгрессын хяналтыг шийдвэрлэх арваннэгдүгээр сарын 3-ны завсрын сонгууль болохоос хэдхэн хоногийн өмнө эрчимжиж байна.
Гомдолд Ардчилсан намынхныг сенатор Салливантай ижил нэртэй хүнийг нэр дэвшүүлж, саналын хуудсанд зориуд оруулах замаар сонгогчдыг төөрөгдүүлэхийг завдсан хэмээн дурджээ. Ардчилсан намаас нэр дэвшигч Мэри Пелтола нь Дональд Трампын ойрын холбоотон Салливаныг суудлаас нь буулгахаар өрсөлдөж байгаа юм. Харин 'New York Times' сонинд Пелтолагийн сонгуулийн багийн гишүүд тэтгэвэрт гарсан багш Дэн Ж. Салливаныг сенаторын сонгогчдын саналыг хуваах зорилгоор нэр дэвшүүлэхэд тусалсан гэх мэдээлэл гарсны дараа Хууль зүйн яам ийнхүү шаардлагаа шинэчилжээ.
Хууль зүйн яам энэ хэргийн хүрээнд 40 зарлан дуудах хуудас болон баримт бичгийг хадгалах хүсэлт хүргүүлсэн тухай Reuters агентлаг мэдээлэв. Түүнчлэн Аляскийн захирагч Майк Данливи уг хэрэгт эрүүгийн мөрдөн шалгах ажиллагаа явуулах үүрэг өгсөн байна. Харин Пелтолагийн баг энэхүү ажиллагаанд ямар нэгэн холбоогүй хэмээн мэдэгдлээ. Гэвч прокурорууд Ардчилсан намын нэр дэвшигч болон түүний талынхныг сонгогчдыг хууран мэхлэх хуурамч кампанит ажил зохион байгуулсан гэж буруутгаж байна.
АНУ-ын Үндсэн хуулийн дагуу сонгуулийн зохион байгуулалтыг Ерөнхийлөгчийн засаг захиргаа бус, муж улсууд хариуцдаг тул холбооны засгийн газрын энэ үйлдэл сонгуулийн шударга байдалд хөндлөнгөөс оролцсон хэрэг гэсэн шүүмжлэл дагууллаа. Өнгөрсөн зургаадугаар сард Аляскийн Дээд шүүх нэр нэгтэй өрсөлдөгчийг сонгуульд оролцох эрхтэй гэж шийдвэрлэсэн бөгөөд муж улсын сонгуулийн байгууллага хоёр нэр дэвшигчийг ялгах арга хэмжээг аль хэдийн авчээ. Үүний зэрэгцээ эцсийн санал хураалтын тооноос сонгогчийн жинхэнэ санааг шууд тодорхойлох боломжгүй хэмээн шинжээчид үзэж байна.
Сенатад Бүгд найрамдах нам одоогоор 100 суудлаас 53-ыг авч, маш бага зөрүүгээр олонх болж байгаа бөгөөд Аляскийн энэ өрсөлдөөн танхим дахь хяналтыг тогтоох шийдвэрлэх долоон тойргийн нэгд тооцогдож байна.
