Дэлхийн хамгийн том криптовалютын бирж Binance аюулгүй байдлын зөрчил үүссэн байж болзошгүй нөхцөл байдлыг шалгаж буйгаа пүрэв гарагт батлав. Тус компанийн томоохон хувьцаа эзэмшигч хэвээр байгаа гүйцэтгэх захирал асан Чанпэн Жао 'Энэ нь Binance руу халдсан хакер дайралт шиг харагдаж байна' хэмээн мэдэгдсэн байна.
Сэжигтэй халдлагын хариуд нийт 2.5 тэрбум ам.долларын (2.8 тэрбум евро) хөрөнгийг царцаажээ. Хэдийгээр эрсдэл үүссэн ч компанийн төлөөлөгч 'Хэрэглэгчдийн хөрөнгө бүрэн аюулгүй гэдэгт итгэлтэй байж болно' гэдгийг онцолсон байна. Аюулгүй байдлын зөрчлийн цар хүрээг хараахан албан ёсоор зарлаагүй бөгөөд ямар нэгэн крипто хөрөнгө хулгайлагдсан эсэхийг тус бирж тодорхой мэдээлээгүй юм.
Өдөр тутмын крипто арилжааны хэмжээгээр дэлхийд тэргүүлдэг Binance зарим бүтээгдэхүүний арилжааг түр зогсоолоо. Үүний зэрэгцээ тус платформыг ашигладаг томоохон крипто компаниуд хөрөнгөө царцаах арга хэмжээ авч эхэлсэн байна. Тухайлбал, Tether компани 1.6 тэрбум ам.долларын USDT-г царцаасан бол Circle компани 800 сая ам.долларын үнэлгээ бүхий USDC-г хаажээ.
Хакер халдлага гарсан тухай мэдээлэл цацагдсаны дараа Биткоины ханш пүрэв гарагийн орой 3.2 хувиар унаж, 79,000 ам.доллароос доошилсон байна. Binance-ийг 2017 онд үүсгэн байгуулсан Жао 'Хувьцаа эзэмшигчийн хувьд хэрэглэгчдийн бүх хөрөнгө бүрэн хамгаалагдана гэж найдаж байна' хэмээн дурджээ.
Чанпэн Жао нь 2023 онд бирж дээрээ мөнгө угаахтай тэмцэх үүргээ биелүүлээгүй гэдгээ хүлээн зөвшөөрсний дараа гүйцэтгэх захирлын албан тушаалаасаа огцорсон юм. Улмаар АНУ-ын Ерөнхийлөгч Дональд Трамп түүнд 2025 онд уучлал үзүүлсэн бөгөөд Жао болон Binance компани нь Трамп болон түүний гэр бүлийн крипто төслүүдийг гол дэмжигчдийн нэг байсаар иржээ.
