Бахамын арлуудын Умард Бимини арлын ойролцоо гэр бүлээрээ усанд сэлж явсан Британийн 36 настай эмэгтэй хүчтэй урсгалд автсан хоёр хүүгээ аврах гэж оролдох явцдаа амиа алджээ. Тус улсын Хааны цагдаагийн албанаас мэдээлснээр уг харамсалтай явдал мягмар гарагт болсон бөгөөд одоогоор мөрдөн шалгах ажиллагааг эхлүүлээд байна.
Урьдчилсан мэдээллээр талийгаач нөхөр болон хоёр хүүгийн хамт арлын өмнөд хэсэгт шумбаж сэлж байхад далайн хүчтэй давалгаа, урсгал хөвгүүдийг нь гэнэт хаман авч одсон байна. Эх нь хүүхдүүдээ татаж гаргахаар араас нь орох үедээ өөрөө мөн хүчтэй урсгалд автжээ. Хожим нь хөвгүүдийг уснаас амжилттай татаж гарган, амийг нь аварсан байна.
Элис Таун дахь цагдаагийн хэсэгт өглөөний 10:00 цагийн орчимд усан онгоцны зогсоол дээр нэг эмэгтэй ухаангүй байна гэсэн дуудлага иржээ. Аврагчид түүнийг уснаас гарган зогсоол дээр анхны тусламж, зүрх судасны сэхээн амьдруулах арга хэмжээ авч, орон нутгийн эмнэлэгт хүргэсэн боловч эмч нар амийг нь аварч чадалгүй нас барсныг зарласан байна. Цагдаагийн газраас гаднын нөлөөтэй гэж үзэх сэжиггүй хэмээн мэдэгдсэн бөгөөд үхлийн яг тодорхой шалтгааныг тогтоохоор задлан шинжилгээ хийхээр төлөвлөжээ.
Их Британийн Гадаад хэрэг, хамтын нөхөрлөл, хөгжлийн яамны төлөөлөгч мэдэгдэхдээ, талийгаачийн ар гэрийнхэнтэй холбоо тогтоож, шаардлагатай дэмжлэг, туслалцаа үзүүлэн ажиллаж байна гэв. Умард Бимини арал нь АНУ-ын Флорида мужийн Майами хоттой хамгийн ойр орших Бахамын жижиг арлуудын бүлэг юм.
