Сөүл хотын төвд орших Намдэмүн захын ойролцоох эмийн сангуудаар гадаадын иргэд урт дараалал үүсгэн үйлчлүүлэх нь сүүлийн үед эрс нэмэгдэв. Жуулчид зөвхөн эрчим хүчний ундаа худалдаж аваад зогсохгүй, батганы тос, сорви арилгах гель болон PDRN найрлагатай арьс арчилгааны бүтээгдэхүүнүүдийг их хэмжээгээр сагсандаа хийж байна. Энэ нь Өмнөд Солонгосын гоо сайхны аялал жуулчлалын урсгал зөвхөн томоохон дэлгүүрүүдэд бус, эмийн сангууд руу шилжиж байгааг илтгэлээ.
Намдэмүн захад хоёр дахь жилдээ эмийн сан ажиллуулж буй Пак Жүн Сон ярихдаа, одоогоос жилийн өмнөөс эхлэн гадны үйлчлүүлэгчдийн тоо огцом өссөн бөгөөд одоо нийт борлуулалтынх нь 40-50 хувийг жуулчид эзлэх болсныг онцоллоо. Мөн дотоодын иргэдэд голчлон үйлчилдэг харьцангуй том эмийн сангуудад ч арван үйлчлүүлэгчийн нэг нь гадаадын иргэн байх болсон бөгөөд тэд ихэвчлэн арьс хамгаалалтын бүтээгдэхүүн эрэлхийлдэг тухай эмийн санчид мэдээлж байна.
Солонгосын Аялал жуулчлалын байгууллагаас гаргасан судалгаанаас үзвэл, өнгөрсөн есдүгээр сард гадаадын жуулчдын эмнэлгийн үйлчилгээтэй холбоотой зарцуулалтын 13.88 хувийг эмийн сангийн худалдан авалт эзэлжээ. Энэ нь нийт 31.8 тэрбум вон буюу 24 сая ам.доллар болсон нь 2025 оны арванхоёрдугаар сарын үзүүлэлт болох 8.3 хувиас даруй 5.6 хувиар өссөн үзүүлэлт юм.
Энэхүү хандлага үүсэхэд БНСУ-ын Эмийн асуудал хариуцсан хууль болон бүтээгдэхүүний өвөрмөц чанар голлон нөлөөлж байна. Тухайлбал, Dong-A Pharmaceutical-ийн сорвины Noscana гель болон батганы Acnon тос нь зөвхөн эмийн сангуудаар жоргүй олгогддог эмчилгээний ангиллын бүтээгдэхүүн тул ердийн гоо сайхны сүлжээ дэлгүүрүүдээр зарагддаггүй. Түүнчлэн PDRN найрлагатай бүтээгдэхүүн зэрэг эмийн сангийн арьс арчилгааны хэрэгслүүдийг авахаар жуулчид зорьдог аж.
Сошиал медиа платформ, тэр дундаа инстаграм дээрх зөвлөмжүүд үүнд хүчтэй нөлөөлжээ. Сингапур, Тайвань, Мексик зэрэг орноос ирж буй зочид нутагтаа худалдан авах боломжгүй эсвэл танил бус бүтээгдэхүүний жагсаалтыг урьдчилан бэлтгэж ирдэг байна. Эмийн сангуудын хувьд ширүүн өрсөлдөөний улмаас эмийн үнэ буурч, ашиг багасч байсан үед гоо сайхны энэхүү шинэ эрэлт бизнесийг нь дэмжих таатай боломж олгож буйг эмийн санчид тэмдэглэв.
Сөүлийн гоо сайхны худалдааны гол цэг болох Мёндон дүүрэгт энэ үзэгдэл бүр ч хүчтэй өрнөж байна. Olive Young зэрэг гоо сайхны аварга дэлгүүрүүдийн дэргэд байрлах эмийн сангууд зөвхөн эм худалдаалахаас гадна зөвлөгөө өгөх мэргэжлийн хөтөч ажиллуулж, бие даасан гоо сайхны дэлгүүрийн хэв маягаар ажиллаж эхэлжээ. Гадаадын жуулчид эмийн санд зарагдаж буй бүтээгдэхүүний найрлага, чанарт илүү итгэдэг нь энэ төрлийн худалдан авалтыг эрчимжүүлэх гол хүчин зүйл болсоор байна.
